കുന്നുംകൈ: ഓണാഘോഷം കണക്കിലെടുത്ത് മലയോരത്ത് മദ്യം ഒഴുകാന്‍ സാധ്യതയുള്ളതിനാല്‍ എക്‌സൈസ് വകുപ്പ് പരിശോധന കര്‍ശനമാക്കി.
 വ്യാജമദ്യ നിര്‍മാണം, ഉപഭോഗം, വിപണനം എന്നിവ കണ്ടെത്തി തടയുന്നതിന് പ്രത്യേക സ്‌ക്വാഡ് തന്നെ രംഗത്തെത്തിയിട്ടുണ്ട്. സംയുക്ത വാഹനപരിശോധന, വനമേഖലയില്‍ റെയ്ഡുകള്‍, മദ്യഷാപ്പുകളില്‍ പരിശോധന, ജില്ലാ അതിര്‍ത്തികളില്‍ പട്രോളിങ് എന്നിവയും ശക്തമാക്കി.
 സ്പിരിറ്റ്, മയക്കുമരുന്ന്, സെക്കന്‍ഡ്‌സ് മദ്യം, മാഹി, കര്‍ണാടക, ഗോവ എന്നിവിടങ്ങളില്‍ നിന്നുള്ള മദ്യസംഭരണം, വിപണനം, കടത്ത് എന്നിവ ശ്രദ്ധയില്‍പ്പെടുന്നവര്‍ വിവരം വകുപ്പിനെ അറിയിക്കണം.
മലയോരത്തെ ആദിവാസികളെയും കോളനികളിലും വ്യാജവാറ്റും വില്‍പനയും നടത്തുന്നത് ശ്രദ്ധയില്‍പ്പെട്ടതിനെ തുടര്‍ന്ന് വനമേഖല, കോളനികള്‍, ഇതരസംസ്ഥാന തൊഴിലാളികള്‍ താമസിക്കുന്ന സ്ഥലങ്ങള്‍ എന്നിവിടങ്ങളില്‍ സാമൂഹികക്ഷേമ വകുപ്പിന്റെ സഹായത്തോടെ പരിശോധനകളും റെയ്ഡും നടത്തും. പൊലിസ്, റവന്യൂ, എക്‌സൈസ്, ഫോറസ്റ്റ് ഉദ്യോഗസ്ഥരുടെ സംയുക്ത പരിശോധനയും സ്‌പെഷല്‍ ഡ്രൈവിന്റെ ഭാഗമായി നടക്കും.
 അനധികൃത മദ്യം, മയക്കുമരുന്ന്, പുകയില ഉല്‍പന്നങ്ങള്‍ എന്നിവയുടെ ഉല്‍പാദനം, വിപണനം എന്നിവയില്‍ ഏര്‍പ്പെടുന്നവര്‍ക്കെതിരേ കര്‍ശന നടപടി സ്വീകരിക്കും. ലൈസന്‍സ് വ്യവസ്ഥകള്‍ ലംഘിക്കുന്ന കള്ളുഷാപ്പുകളില്‍ നിരീക്ഷണം കര്‍ശനമാക്കും.  
പാണത്തൂര്‍ ചെക്ക്‌പോസ്റ്റ് വഴി വ്യാപകമായി മദ്യം ഒഴുകാന്‍ സാധ്യതയുള്ളതിനാല്‍ ഈ ഭാഗങ്ങളില്‍ പ്രത്യേക നിരീക്ഷണമേര്‍പ്പെടുത്തും. പൊലിസും എക്‌സൈസ് വകുപ്പും സംയോജിപ്പിച്ചാണ് പ്രവര്‍ത്തനങ്ങള്‍ക്ക് നേതൃത്വം നല്‍കുന്നത്.
പൊതുജനങ്ങളില്‍ നിന്നു വിവരങ്ങള്‍ സ്വീകരിക്കാനും അവ വകുപ്പ് തലവന്മാര്‍ക്കു കൈമാറാനുമായി സജ്ജീകരണങ്ങള്‍ നടത്തിയിട്ടുണ്ട്.