പത്തനംതിട്ട: യുവതിയെ കാറിൽക്കയറ്റി ബലം പ്രയോഗിച്ച് കഞ്ചാവ് വലിപ്പിക്കുകയും ശാരീരികമായി അപമാനിക്കുകയും ചെയ്ത കേസിൽ രണ്ടുപേർ അറസ്റ്റിൽ. നിരവധി ക്രിമിനൽ കേസുകളിൽ പ്രതിയായ കല്ലുപ്പാറ കടമാൻകുളം ചാമക്കുന്ന് കോളനിയിൽ ബസലേൽ സി മാത്യു(37), തിരുവല്ല യമുനാ നഗർ ദർശനയിൽ സ്റ്റോയി വർഗീസ്(30) എന്നിവരെയാണ് കീഴ് വായ്പൂർ പൊലിസ് അറസ്റ്റ് ചെയ്തത്. 

ജൂൺ മൂന്നിന് വൈകീട്ടാണ് കടമാങ്കുളം ഗവ. ഹെൽത്ത് സെന്ററിന് സമീപം റോഡിൽ വച്ച് യുവതിയെ പ്രവീൺ ബലംപ്രയോഗിച്ച് കാറിൽ കയറ്റി കൊണ്ടുപോയത്. ഒപ്പമുണ്ടായിരുന്ന സ്റ്റോയി വർഗീസ് കൈയിലിരുന്ന കത്തികാട്ടി ഭീഷണിപ്പെടുത്തി കഞ്ചാവ് വലിപ്പിക്കുകയും ദൃശ്യങ്ങൾ മൊബൈൽ ഫോണിൽ ചിത്രീകരിക്കുകയും ചെയ്തു.തുടർന്ന് ദൃശ്യങ്ങൾ പ്രചരിപ്പിക്കുമെന്ന് ഭീഷണിപ്പെടുത്തി. തുടർന്നാണ് യുവതി പൊലിസിൽ പരാതി നൽകിയത്. കേസിലെ മറ്റൊരു പ്രതിക്കായുള്ള അന്വേഷണം ഊർജിമാക്കിയതായി പൊലിസ് പറഞ്ഞു.

തിരുവല്ല ഡിവൈ.എസ്.പി എസ്. അഷാദിന്റെ മേൽനോട്ടത്തിൽ ഇൻസ്‌പെക്ടർ വിപിൻ ഗോപിനാഥിന്റെ നേതൃത്വത്തിലുള്ള സംഘമാണ് അന്വേഷണം നടത്തുന്നത്.