പാരിസിൽനിന്ന് ആൽബിൻ ബേബി

പാരിസ്: ഒളിംപിക്സിൽ ഇന്നലെ ഇന്ത്യക്ക് നിരാശയുടെ ദിനം. പ്രതീക്ഷയുണ്ടായിരുന്ന രണ്ട് മെഡലുകൾ നഷ്ടമായി. പുരുഷ, വനിതാ 10 മീറ്റർ എയർ റൈഫിൾസിൽ മത്സരിച്ചിരുന്ന അർജുൻ ബബൂത്തക്കും രമിത ജിൻഡാലിനുമാണ് മെഡൽ നഷ്ടമായത്. ആദ്യം മത്സരിച്ച രമിത ഏഴാം സ്ഥാനത്ത് ഫിനിഷ് ചെയ്തപ്പോൾ പുരുഷ വിഭാഗത്തിൽ അർജുൻ ബബൂത്ത നാലാം സ്ഥാനത്ത് ഫിനിഷ് ചെയ്തു. 208.4 പോയിന്റാണ് അർജുൻ നേടിയത്. രമിത 145.3 പോയിന്റും നേടി. അവസാന റൗണ്ട് വരെ മുന്നിലായിരുന്ന ബബൂത്ത അവസാന ഷോട്ടിലായിരുന്നു പിറകിലായത്. 

ഇതോടെ ഇന്ത്യയുടെ മെഡൽ കൈവിട്ടു പോയി. പുരുഷ ഹോക്കിയിൽ ഇന്ത്യ അർജന്റീനയോട് സമനില പിടിച്ചത് നേട്ടമായി. 1-1 എന്ന സ്‌കോറിനായിരുന്നു മത്സരം അവസാനിച്ചത്. മത്സരത്തിന്റെ അവസാനത്തിലായിരുന്നു സമനില ഗോളുമായി ഇന്ത്യ തിരിച്ചുവന്നത്. പുരുഷ ബാഡ്മിന്റണിൽ ലക്ഷ്യ സെൻ ബെൽജിയം താരം ജൂലിയാൻ കരാഗിലെ തോൽപിച്ചു (21-19, 21-14). അമ്പെയ്ത്തിൽ ഇന്നലെയും ഇന്ത്യക്ക് നേട്ടമൊന്നും സ്വന്തമാക്കാനായില്ല. പുരുഷ ടീം ഇനത്തിലും ഇന്ത്യ സെമി കാണാതെ പുറത്തായി. ക്വാർട്ടറിൽ തുർക്കിയോടായിരുന്നു ഇന്ത്യ തോറ്റത്. നേരത്തെ ഇന്ത്യൻ വനിത അമ്പെയ്ത്ത് ടീമും ക്വാർട്ടർ ഫൈനൽ കാണാതെ പുറത്തായിരുന്നു. ഇന്ന് ഇന്ത്യക്ക് ഏഴ് ഇനങ്ങളിലാണ് മത്സരങ്ങളുള്ളത്. ഇന്ന് 10 മീറ്റർ എയർ പിസ്റ്റൾ വിഭാഗത്തിൽ ഇന്ത്യ വെങ്കല മെഡൽ മത്സരത്തിനിറങ്ങുന്നുണ്ട്. ഇന്ത്യക്കായി മനു ഭക്കർ, സരഭ്ജ്യോത് സിങ് എന്നിവരാണ് ഇറങ്ങുന്നത്.

Disappointing Day for India at the Olympics: Two Medal Hopes Dashed