മലപ്പുറം: ഉരുള്‍പൊട്ടല്‍ ദുരന്തത്തില്‍ കാണാതായവര്‍ക്കായി ചാലിയാറിലും ഉള്‍വനത്തിലുമായി സമാന്തര തെരച്ചില്‍ ആരംഭിച്ചു. പോത്തുകല്‍, മുണ്ടേരി ഭാഗങ്ങളിലായി ആയിരകണക്കിനാളുകളെ അണിനിരത്തിയാണ് നിര്‍ണായക തെരച്ചില്‍. പൊലിസ്, വനംവകുപ്പ്, ആരോഗ്യപ്രവര്‍ത്തകര്‍, പോത്തുകല്‍ പഞ്ചായത്ത് അധികൃതര്‍, സന്നദ്ധപ്രവര്‍ത്തകര്‍, നാട്ടുകാര്‍ തുടങ്ങിയവരുടെ നേതൃത്വത്തില്‍ രണ്ടുസംഘമായാണ് തെരച്ചില്‍ നടത്തുന്നത്.  ഒരോ ടീമിലും സി.ഐ റാങ്കിലുള്ള പൊലിസുകാര്‍ നേതൃത്വം നല്‍കാനുണ്ടാകും.

ഒരു സംഘം കുമ്പളപാറ വഴി ഉള്‍വനത്തിലേക്കും മറ്റൊരുസംഘം തലപ്പാലി വഴി ചാലിയാര്‍ പുഴയിലുമായി തെരച്ചില്‍ നടത്തും. ഇന്ന് ഇരു ടീമുകള്‍ക്കും സഞ്ചരിക്കാന്‍ കഴിയുന്ന പരമാവധി ദൂരത്തില്‍ തിരച്ചില്‍ നടത്തും. വനമേഖലയിലുള്ള തിരച്ചിലിന് വനംവകുപ്പ് ഉദ്യോഗസ്ഥര്‍ മാര്‍ഗനിര്‍ദേശം നല്‍കാനുണ്ടാകും. ഹെലികോപ്റ്ററുകള്‍, ഡ്രോണുകള്‍, ബോട്ടുകള്‍ തുടങ്ങിയ സംവിധാനങ്ങളും ഉപയോഗിക്കും.