പൊന്നാനി: കുറ്റിപ്പുറം-പുതുപൊന്നാനി ദേശീയപാതയിലെ ചമ്രവട്ടം-പുതുപൊന്നാനി റീച്ചിന്റെ നിര്‍മാണം അടുത്ത മാര്‍ച്ചോടെ പൂര്‍ത്തിയാകും. യുദ്ധകാലാടിസ്ഥാനത്തിലാണ് നിര്‍മാണപ്രവൃത്തി പുരോഗമിക്കുന്നത്. പാതയുടെ പ്രധാന നിര്‍മാണ പ്രവൃത്തിയായ പള്ളപ്രം മേല്‍പ്പാലത്തിന്റെ കോണ്‍ക്രീറ്റിങ് ഇന്നലെ തുടങ്ങി.
മേല്‍പ്പാലത്തിന്റെ നിര്‍മാണ പ്രവൃത്തികളാണ് ഇപ്പോള്‍ പുരോഗമിക്കുന്നത്. ജൂണില്‍ നിര്‍മാണം പൂര്‍ത്തിയാക്കുകയും ഗതാഗതത്തിനായി തുറന്നുകൊടുക്കുകയും ചെയ്യാമെന്നു കരാറുണ്ടണ്ടായിരുന്നെങ്കിലും നിലവിലെ സാഹചര്യത്തില്‍ നിര്‍മാണ പ്രവൃത്തികള്‍ മാര്‍ച്ചിലാണ് പൂര്‍ത്തിയാക്കാനാവുക. നിര്‍മാണക്കമ്പനിയായ പെരുമ്പാവൂര്‍ ആസ്ഥാനമായുള്ള ഇ.കെ.കെ എന്റര്‍പ്രൈസസ് ലിമിറ്റഡ് അറിയിച്ചതാണ് ഇക്കാര്യം.
നിര്‍മാണത്തിന്റെ ഭാഗമായി 32 മീറ്റര്‍ നീളമുള്ള ആദ്യ സ്ലാബിന്റെ കോണ്‍ക്രീറ്റ് പ്രവൃത്തികള്‍ ഇന്നലെ ആരംഭിച്ചു. മൂന്നാം റീച്ചിന്റെ നിര്‍മാണ പ്രവൃത്തികളാണ് ഇപ്പോള്‍ നടക്കുന്നത്. ഉറൂബ് നഗര്‍ മുതല്‍ ആനപ്പടിവരെയുള്ള ഒന്നര കിലോമീറ്റര്‍ ഭാഗത്താണ് കനോലി കനാലിന് കുറുകെ പാലമുള്‍പ്പെടെയുള്ള നിര്‍മാണ പ്രവൃത്തികള്‍ നടക്കുന്നത്. ഉറൂബ് നഗര്‍ മുതല്‍ ആനപ്പടി വരെയുള്ള ഒന്നര കിലോമീറ്റര്‍ ദൂരം പാലമുള്‍പ്പെടെ നിര്‍മിക്കാന്‍ മൂന്നു കോടി 75 ലക്ഷം രൂപയാണ് ചെലവ്.