തിരുവനന്തപുരം: ആര്‍എസ്എസ് നേതാവിനെ എഡിജിപി അജിത് കുമാര്‍ കണ്ടത് മുഖ്യമന്ത്രിയുടെ അറിവോടെയെന്ന് കോണ്‍ഗ്രസ് നേതാവ് കെ. മുരളീധരന്‍. തൃശൂരില്‍ ബിജെപി സ്ഥാനാര്‍ഥിയെ ജയിപ്പിക്കാനുള്ള ഗൂഢാലോചനയുടെ തുടക്കമായിരുന്നു അതെന്നും മുരളീധരന്‍. പൂരം കലങ്ങിയതോടെ മുഴുവന്‍ വികാരവും ബിജെപിക്ക് അനുകൂലമാക്കി കൊടുത്തു.

അതിന്റെ ഭാഗമായാണ് ബിജെപി സ്ഥാനാര്‍ത്ഥി ജയിച്ചതും. ആര്‍എസ്എസ് നേതാവിനെ ഒരു ഉന്നത പൊലിസ് ഉദ്യോഗസ്ഥന്‍ കാണാന്‍ പോകുമ്പോള്‍ മുഖ്യമന്ത്രിയെയോ ഡിജിപിയെയോ അറിയിക്കേണ്ടതാണ്. സ്വകാര്യ സന്ദര്‍ശനമാണെന്നാണ് അജിത് കുമാര്‍ പറയുന്നത്. എന്നാല്‍ കൂടിക്കാഴ്ചയില്‍ ആര്‍എസ്എസ് നേതാവുമായി മുഖ്യമന്ത്രിയുടെ സന്ദേശം പങ്കുവയ്ക്കുകയാണ് എഡിജിപി ചെയ്തതെന്നും മുരളീധരന്‍.

ബിജെപിക്ക് ഒരു എം.പി കേരളത്തിലുണ്ടായതിന്റെ ഉത്തരവാദിത്തം മുഖ്യമന്ത്രി പിണറായി വിജയനാണ്. വി.ഡി സതീശന്റെ ആരോപണം നിഷേധിക്കാനും മുഖ്യമന്ത്രിക്ക് കഴിഞ്ഞില്ലെന്നു മുരളീധരന്‍ പറഞ്ഞു. എഡിജിപി അജിത്കുമാര്‍ മുഖ്യമന്ത്രിക്കു വേണ്ടി ആര്‍എസ്എസ് ദേശീയ നേതൃത്വവുമായി ചര്‍ച്ച നടത്തിയെന്നായിരുന്നു പ്രതിപക്ഷ നേതാവായ വി.ഡി.സതീശന്റെ ആരോപണം.

പൂരം കലക്കാനായിരുന്നു കൂടിക്കാഴ്ചയെന്നാണ് പ്രതിപക്ഷ നേതാവ് ആരോപിച്ചിരുന്നത്. 2023 മെയ് 20 മുതല്‍ 22 വരെ തൃശൂര്‍ പാറമേക്കാവ് വിദ്യാമന്ദിറില്‍ നടന്ന ആര്‍എസ്എസ് ക്യാംപില്‍ വച്ച് അജിത്കുമാര്‍ ചര്‍ച്ച നടത്തിയെന്നായിരുന്നു വിഡി സതീശന്‍ വെളിപ്പെടുത്തിയത്. അജിത്കുമാറിന്റെ ഔദ്യോഗിക വാഹനം നിര്‍ത്തിയിട്ട ഹോട്ടലിന്റെ പേരുള്‍പ്പെടെയാണ് സതീശന്‍ പുറത്തുവിട്ടത്.