പൂച്ചാക്കല്‍: കുളത്തില്‍ കുളിക്കാനിറങ്ങിയ രണ്ട് വിദ്യാര്‍ഥികള്‍ മുങ്ങിമരിച്ചു. നദ്‌വത്തുല്‍ ഇസ്‌ലാം യു.പി സ്‌കൂള്‍ ഏഴാം ക്ലാസ് വിദ്യാര്‍ഥികളായ അരൂക്കുറ്റി പഞ്ചായത്തിലെ വെളിപ്പറമ്പില്‍ സുധീര്‍-ഫാസില ദമ്പതികളുടെ മകന്‍ എസ്. തൗഫീഖ് റഹ്മാന്‍ (12), പുത്തലത്ത് വീട്ടില്‍ ഫൈസല്‍-ഷെമീറ ദമ്പതികളുടെ മകന്‍ പി.എഫ് മുഹമ്മദ് ഫയാസ് എന്നിവരാണ് മരിച്ചത്.
ബുധനാഴ്ച വൈകുന്നേരം മൂന്നുമണിയോടെയായിരുന്നു സംഭവം. അഞ്ചുപേര്‍ അടങ്ങുന്ന സംഘമാണ് സ്‌കൂള്‍ വിട്ട് കുളിക്കാനെത്തിയത്. ഇതില്‍ മൂന്ന് പേര്‍ കുളിച്ചശേഷം മടങ്ങിപോകുകയും ചെയ്തു. തൗഫീഖിന്റെയും ഫയാസിന്റെയും വസ്ത്രങ്ങളും സൈക്കിളും കുളത്തിനരികില്‍ കണ്ട് നാട്ടുകാരായ യുവാക്കള്‍ കുളത്തില്‍ തിരച്ചില്‍ നടത്തിയപ്പോഴാണ് രണ്ട് പേരുടെയും മൃതദേഹം ലഭിച്ചത്. പൂച്ചാക്കാല്‍ പൊലിസ് സ്ഥലത്തെത്തി മേല്‍നടപടികള്‍ സ്വീകരിച്ച് മൃതദേഹം ചേര്‍ത്തല താലൂക്ക് ആശുപത്രിയിലേക്ക് മാറ്റി. തൗഫീഖ് റഹ്മാന്റെ ഖബറടക്കം കോട്ടൂര്‍ പള്ളി ഖബര്‍സ്ഥാനില്‍ നടത്തി. സഹോദരന്‍ ഫസല്‍. മുഹമ്മദ് ഫയാസിന്റെ ഖബറടക്കം കാട്ടുപുറം പള്ളി ഖബര്‍സ്ഥാനില്‍ നടത്തി. സഹോദരികള്‍: ഫര്‍സാന, റിസ്‌വാന.