കണ്ണൂർ: മുസ്‌ലിം ലീഗ് പ്രവർത്തകൻ അരിയിൽ ഷുക്കൂർ വധക്കേസിൽ വീണ്ടും പ്രതിരോധത്തിലായി സി.പി.എം. സി.പി.എം കണ്ണൂർ മുൻ ജില്ലാസെക്രട്ടറി പി. ജയരാജന്റെയും ടി.വി രാജേഷിൻ്റെയും വിടുതൽ ഹരജി സി.ബി.ഐ സ്പെഷൽ കോടതി തള്ളിയതോടെയാണ് പാർട്ടിയെ വീണ്ടും പ്രതിരോധത്തിലാക്കിയത്. ഉന്നതനേതാക്കൾ വിചാരണ നേരിടേണ്ടിവരുന്നതോടെ വീണ്ടും അക്രമരാഷ്ട്രീയം ചർച്ചയാകുമോയെന്ന ആശങ്കയിലാണ് പാർട്ടി. പ്രഥമദൃഷ്ട്യാ ഇരുവർക്കും ഗുഢാലോചനയിൽ പങ്കുണ്ടെന്ന കോടതിയുടെ കണ്ടെത്തൽ സി.പി.എമ്മിനെ പ്രതികൂട്ടിലാക്കിയിരിക്കുകയാണ്.

പി.ജയരാജന്റെ വാഹന വ്യൂഹത്തിന് നേരെ കല്ലെറിഞ്ഞു എന്നാരോപിച്ചായിരുന്നു 2012 ഫെബ്രുവരി 20ന് ഷുക്കൂറിനെ 30ഓളം വരുന്ന സി.പി.എം പ്രവർത്തകർ ചേർന്ന് തടങ്കലിൽവച്ച് വിചാരണ ചെയ്ത് കൊലപ്പെടുത്തിയത് എന്നാണ് കേസ്.

ഷുക്കൂറിനെ കൊലപ്പെടുത്താനുള്ള ഗൂഢാലോചന തളിപ്പറമ്പ് സഹകരണ ആശുപത്രിയിൽ നടന്നുവെന്നാണ് സി.ബി.ഐയുടെ കണ്ടെത്തൽ. പി. ജയരാജന്റെയും ടി.വി രാജേഷിന്റെയും ആശുപത്രിയിലെ സാന്നിധ്യം കുറ്റപത്രത്തിൽ പറഞ്ഞിരുന്നു. പാർട്ടി കോടതി ചേർന്നാണ് ഷുക്കൂറിനെ വധിച്ചതെന്ന വാർത്തകൾ അന്ന് പൊലിസിനെ ഉദ്ധരിച്ചുകൊണ്ടുവന്നിരുന്നു.

പാർട്ടി കോടതി വിചാരണ നടത്തി നടപ്പാക്കിയ വധശിക്ഷയെന്ന ആരോപണം സി.പി.എമ്മിന് ക്ഷീണമായി മാറി. ദേശീയ ശ്രദ്ധയാകർഷിച്ച കൊലപാതകമായി അരിയിൽ ഷുക്കൂർ വധക്കേസ് മാറി.

പി.ജയരാജനും ടി.വി രാജേഷും സഞ്ചരിച്ച വാഹനം അരിയിൽ ആക്രമിക്കപ്പെട്ടതിനെ തുടർന്ന് മണിക്കൂറിനുള്ളിലായിരുന്നു കൊലപാതകം. ഷുക്കൂറിനൊപ്പം നാട്ടുകാരനായ സക്കറിയയ്ക്കു വെട്ടേറ്റു. ഇവർക്കൊപ്പമുണ്ടായിരുന്ന മൂന്നുപേർക്കു ക്രൂരമായ മർദനമേറ്റിരുന്നു.

സി.പി.എം നേതാക്കളും സജീവപ്രവർത്തകരുമായ 33പേരായിരുന്നു കേസിലെ പ്രതികൾ. പി.ജയരാജൻ 32ാം പ്രതിയും ടി.വി. രാജേഷ് 33ാം പ്രതിയുമാണ്. ഗൂഢാലോചനയ്ക്കാണ് ഇവർക്കെതിരേ ആദ്യം കേസെടുത്തതെങ്കിലും പിന്നീടതു പ്രേരണാക്കുറ്റമാക്കി മാറ്റുകയായിരുന്നു.

സംഭവദിവസം ക്രിക്കറ്റ് കളിക്കിടെ പരുക്കേറ്റ ഒരാളുമായി ചെറുകുന്നിലെ ആശുപത്രിയിലേക്കുപോവുകയായിരുന്നു ഷുക്കൂർ അടങ്ങുന്ന സംഘം. കടത്തുകടന്ന് ഇവർ പോകുന്നതു കണ്ട സി.പി.എം പ്രവർത്തകർ ബന്ധപ്പെട്ടവർക്കു വിവരം നൽകുകയായിരുന്നു. ഇതു മൊബൈൽ ഫോണുകളിലൂടെ പല ഭാഗങ്ങളിലേക്കും പ്രചരിച്ചു. തുടർന്നു പ്രവർത്തകർ ഒത്തുകൂടി ഇവരെ പിന്തുടരുകയായിരുന്നു.

കോളിളക്കം സൃഷ്ടിച്ച കേസിന്റെ വിചാരണ കൂടാതെ വിടുതൽ നൽകണമെന്ന് ആവശ്യപ്പെട്ട് 2023 ജനുവരിയിലായിരുന്നു പി.ജയരാജനും ടി.വി രാജേഷും സംയുക്തമായി വിടുതൽ ഹരജി നൽകിയത്.

കൊലപാതകം, ക്രിമിനൽ ഗൂഢാലോചന തുടങ്ങിയ വകുപ്പുകളാണ് ഇരുവർക്കുമെതിരേ സി.ബി.ഐ കുറ്റപത്രത്തിലുള്ളത്. നേരത്തെ ക്രൈംബ്രാഞ്ച് അന്വേഷിച്ച കേസിൽ ക്രിമിനൽ ഗൂഢാലോചന കുറ്റം ഒഴിവാക്കിയായിരുന്നു കുറ്റപത്രം സമർപ്പിച്ചിരുന്നത്.

പിന്നീട് ഷുക്കൂറിന്റെ മാതാവ് ആത്തിക്ക സമർപ്പിച്ച ഹരജിയിൽ ഹൈക്കോടതി കേസന്വേഷണം സി.ബി.ഐക്ക് വിടുകയും തുടരന്വേഷണത്തിന് ഉത്തരവാവുകയും ചെയ്തു. അതിനെ തുടർന്നാണ് ക്രിമിനൽ ഗൂഢാലോചന കുറ്റവും കൂടി ഉൾപ്പെടുത്തി സി.ബി.ഐ പി.ജയരാജനും ടി.വി രാജേഷിനുമേതിരെ കുറ്റപത്രം സമർപ്പിച്ചത്.

The CPM is under renewed scrutiny in the Shukkur murder case after a CBI court dismissed bail pleas for leaders P. Jayarajan and T.V. Rajesh. The case, dating back to 2012, involves allegations of conspiracy and violence against a Muslim League worker. The court's findings have intensified concerns about the party's involvement, drawing national attention to ongoing legal challenges and calls for further investigation.