ന്യൂഡല്‍ഹി: ഉത്തര്‍പ്രദേശ് പൊലിസ് നടത്തുന്ന ഏറ്റുമുട്ടല്‍ കൊലകള്‍ക്കെതിരെ ആഞ്ഞടിച്ച് കോണ്‍ഗ്രസ് നേതാവ് പ്രിയങ്ക ഗാന്ധി. യുപിയിലെ ഏറ്റുമുട്ടല്‍ കൊലകളെല്ലാം സംശയനിഴലിലാണെന്നും അവയിലെല്ലാം ജുഡീഷ്യല്‍ അന്വേഷണം നടത്തണമെന്നും പ്രിയങ്ക ഗാന്ധി ആവശ്യപ്പെട്ടു.

സുല്‍ത്താന്‍പൂര്‍ ജ്വല്ലറി കവര്‍ച്ച കേസിലെ രണ്ടാം പ്രതിയെ കഴിഞ്ഞ ദിവസം (സപ്തംബര്‍ 23) ഏറ്റുമുട്ടലില്‍ പൊലിസ് വധിച്ചിരുന്നു. അനുജ് പ്രതാപ് സിങ് എന്നയാളാണ് തിങ്കളാഴ്ച പുലര്‍ച്ചെ കൊല്ലപ്പെട്ടത്. ഈ സംഭവം ചൂണ്ടിക്കാട്ടിയാണ് പ്രിയങ്കയുടെ വിമര്‍ശനം. ഏറ്റുമുട്ടല്‍ കൊലയെന്ന പൊലിസ് വാദം തള്ളിയ പ്രിയങ്ക സംഭവത്തില്‍ ജുഡീഷ്യല്‍ അന്വേഷണം നടത്തണമെന്നും ആവശ്യപ്പെട്ടു. 

ആഗസ്റ്റ് 28 നാണ് അചല്‍ഗഞ്ച് പൊലിസ് സ്റ്റേഷന്‍ പരിധിയിലെ സുല്‍ത്താന്‍പൂര്‍ നഗരത്തിലേ തത്തേരി മാര്‍ക്കറ്റിലെ ഭാരത് ജ്വല്ലേഴ്‌സില്‍ നിന്ന് ഏകദേശം 1.5 കോടി രൂപയുടെ സ്വര്‍ണാഭരണങ്ങള്‍ മോഷണം പോയിരുന്നു. കേസിലെ മുഖ്യപ്രതിയായ മങ്കേഷ് യാദവ് സെപ്റ്റംബര്‍ അഞ്ചിന് നടന്ന ഏറ്റുമുട്ടലില്‍ കൊല്ലപ്പെട്ടിരുന്നു. വ്യാജ ഏറ്റുമുട്ടല്‍ കൊലപാതകമാണിതെന്നാരോപിച്ച് സമാജ്‌വാദി പാര്‍ട്ടിയും കോണ്‍ഗ്രസും അന്ന് തന്നെ രംഗത്തെത്തിയിരുന്നു.  

കൊലപാതകം, അക്രമം, രക്തച്ചൊരിച്ചില്‍, ജീവനെടുക്കുന്ന രാഷ്ട്രീയം, ബുള്‍ഡോസര്‍ രാജ് എന്നിവയ്ക്ക് ഭരണഘടനയുമായും നീതിയുമായും യാതൊരു ബന്ധവുമില്ലെന്ന് പ്രിയങ്ക ഗാന്ധി എക്‌സിലെഴുതിയ കുറിപ്പില്‍ പറഞ്ഞു. കോടതി വിധിക്കാതെ നടപ്പാക്കുന്ന ഭരണകൂട വധശിക്ഷകള്‍ കൊലപാതകം തന്നെയാണെന്നും പ്രിയങ്ക ചൂണ്ടിക്കാട്ടുന്നു. .

സമൂഹത്തില്‍ സമാധാനം സ്ഥാപിക്കുക, കുറ്റവാളിയെ പരിഷ്‌കരിക്കാന്‍ ശിക്ഷിക്കുക, ഓരോ പൗരനും ജീവിക്കാന്‍ അവസരം നല്‍കുക എന്നിവയെ അടിസ്ഥാനമാക്കിയുള്ളതാണ് ക്രമസമാധാനം. അപൂര്‍വ്വം ചി ല കേസുകളില്‍ ഒഴികെ കോടതി ഉത്തരവില്ലാതെ എടുക്കുന്ന ഓരോ ജീവനും വെറും കൊലപാതകമാണ്- അവര്‍ കുറിപ്പില്‍ പറയുന്നു. 

കഴിഞ്ഞ ഏഴ് വര്‍ഷത്തിനിടെ യുപിയില്‍ ഏകദേശം 13,000 ഏറ്റുമുട്ടല്‍ കൊലപാതകം നടന്നുവെന്നാണ് റിപ്പോര്‍ട്ടുകള്‍, എന്നിട്ട് സംസ്ഥാനത്തെ ക്രമസമാധാനം മെച്ചപ്പെട്ടിട്ടുണ്ടോ എന്നും പ്രിയങ്ക ചോദിച്ചു. പിന്നെന്തിനാണ് ഈ കളി കളിക്കുന്നത്. ഭരണഘടനാ വിരുദ്ധമായ ഈ നടപടി അവസാനിപ്പിക്കണമെന്നും, എല്ലാ ഏറ്റുമുട്ടല്‍ കൊലപാതകങ്ങളും ജുഡീഷ്യല്‍ അന്വേഷണം നടത്തണമെന്നും അവര്‍ ആവര്‍ത്തിക്കുന്നു. 

Priyanka Gandhi has called for a judicial inquiry into UP police encounters, questioning the legitimacy of these killings. Highlighting recent cases like the Sultanpur heist encounter, she condemns the government's unconstitutional approach and demands accountability.