പാരിസ്: ഗസ്സക്കുമേല്‍ ആക്രമണം ഒരു വര്‍ഷമാകുമ്പോള്‍ ഇസ്‌റാഈലിനുള്ള ആയുധകയറ്റുമതി നിര്‍ത്തിവെച്ച് ഫ്രാന്‍സ്. ഫ്രഞ്ച് ബ്രോഡ് കാസ്റ്ററിന് നല്‍കിയ അഭിമുഖത്തില്‍ പ്രസിഡന്റ് ഇമാനുവല്‍ മാക്രോണാണ് ആയുധകയറ്റുമതി നിര്‍ത്തിവെച്ച വിവരം അറിയിച്ചത്. 

പ്രശ്‌നത്തിന് രാഷ്ട്രീയമായ പരിഹാരമാണ് ഉണ്ടാവേണ്ടതെന്ന് മാക്രോണ്‍ പറഞ്ഞു. അതിനാല്‍ ഗസ്സയിലേക്കുള്ള ആയുധകയറ്റുമതി നിര്‍ത്തുകയാണെന്നും മാക്രോണ്‍ വ്യക്തമാക്കി.

ലബനാനില്‍ കരയാക്രമണത്തിന് സൈന്യത്തെ അയച്ച നെതന്യാഹുവിന്റെ നടപടിയെയും മാക്രോണ്‍ വിമര്‍ശിച്ചു. തങ്ങളെ കേള്‍ക്കാന്‍ നെതന്യാഹു തയാറായില്ല. അത് അവരുടെ ഭാഗത്ത് നിന്നുണ്ടായ ഒരു തെറ്റാണ്- മാക്രോണ്‍ തുറന്നടിച്ചു. ഇത് ഇസ്‌റാഈലിന്റെ സുരക്ഷക്കും ഭീഷണിയാണെന്നും മാക്രോണ്‍ പറഞ്ഞു. 

മാക്രോണ്‍ തീരുമാനം പ്രഖ്യാപിച്ചതിന് പിന്നാലെ ഇതിനെ കടുത്ത ഭാഷയില്‍ വിമര്‍ശിച്ച് ഇസ്‌റാഈല്‍ പ്രധാനമന്ത്രി ബിന്യമിന്‍ നെതന്യാഹു രംഗത്തെത്തി. ഇറാന്റെ പ്രാകൃത സൈന്യത്തോടാണ് ഇസ്‌റാഈലിന്റെ പോരാട്ടം. സംസ്‌കാരമുള്ള രാഷ്ട്രങ്ങളെല്ലാം ഇറാനൊപ്പം നില്‍ക്കുന്നുണ്ട്. ഇപ്പോള്‍ മാക്രോണും ചില പാശ്ചാത്യ രാജ്യങ്ങളും ഇസ്‌റാഈലിലേക്കുള്ള ആയുധകയറ്റുമതി നിര്‍ത്താന്‍ ആവശ്യപ്പെടുന്നു. അവരെയോര്‍ത്ത് നാണക്കേടാണുള്ളതെന്നും നെതന്യാഹു പ്രതികരിച്ചു. ആര് പിന്തുണച്ചാലും ഇല്ലെങ്കിലും തങ്ങള്‍ വിജയിക്കുമെന്നും നെതന്യാഹു കൂട്ടിച്ചേര്‍ത്തു.