ആലപ്പുഴ: സംസ്ഥാനത്ത്  ലക്ഷക്കണക്കിനാളുകളുടെ റേഷന്‍കാര്‍ഡ് മസ്റ്ററിങ് (ഇകെ.വൈ.സി.) അസാധുവാക്കി. ആധാറിലെയും റേഷന്‍കാര്‍ഡിലെയും പേരിലെ പൊരുത്തക്കേടാണ് ഇതിനു പ്രധാന കാരണം. റേഷന്‍കടയിലെ ഇ പോസ് യന്ത്രത്തില്‍ വിജയകരമായി മസ്റ്ററിങ് പൂര്‍ത്തിയാക്കിയവരുടേതാണ് താലൂക്ക് സപ്ലൈ ഓഫീസുകളിലെ വിദഗ്ധ പരിശോധനയ്ക്കുശേഷം അസാധുവാക്കിയത്.

മസ്റ്ററിങ് നടത്തിയവരില്‍ ചിലരുടെ റേഷന്‍ കാര്‍ഡിലെയും ആധാറിലെയും പേരുകളില്‍ പൊരുത്തക്കേടുണ്ട്, അതു മുപ്പതുശതമാനത്തില്‍ കൂടുതലായാല്‍ മസ്റ്ററിങ്ങിനു അസാധുവാകും. റേഷന്‍ ആനുകൂല്യങ്ങള്‍ ഉള്‍പ്പെടെ ഇതുമൂലം തടഞ്ഞുവെക്കാനിടയുണ്ട്. മസ്റ്ററിങ് ആദ്യഘട്ടത്തില്‍ത്തന്നെ പേരിലെ പൊരുത്തക്കേടുമൂലമുള്ള പ്രശ്‌നം സിവില്‍ സപ്ലൈസ് അധികൃതര്‍ സര്‍ക്കാരിന്റെ ശ്രദ്ധയില്‍പ്പെടുത്തിയിരുന്നു, എന്നാല്‍, മസ്റ്ററിങ് അസാധുവാക്കപ്പെടുന്നവരുടെ കാര്യത്തിലുള്ള തുടര്‍നടപടികെളക്കുറിച്ച് ഇതുവരെ തീരുമാനമായിട്ടില്ല.
 
റേഷന്‍കടകളിലെത്തി ഇ പോസ് യന്ത്രത്തില്‍ വിരലടയാളം നല്‍കിയവര്‍ മസ്റ്ററിങ് വിജയകരമായി പൂര്‍ത്തിയാക്കിയെന്നു കരുതിയാണു മടങ്ങുന്നത്, എന്നാല്‍, താലൂക്കുതല പരിശോധനയില്‍ മസ്റ്ററിങ് അസാധുവാക്കപ്പെട്ട വിവരം അവരറിഞ്ഞിട്ടില്ല. സംസ്ഥാനത്ത് മഞ്ഞ, പിങ്ക് കാര്‍ഡുകളിലായി 1.56 കോടി പേരുടെ മസ്റ്ററിങ്ങാണ് ഇതുവരെ പൂര്‍ത്തിയായത്. അതില്‍ 20 ലക്ഷത്തോളം പേരുടെ മസ്റ്ററിങ്ങിന്റെ സാധുത പരിശോധിക്കാനുണ്ട് അതുകൂടി കഴിയുമ്പോള്‍ അസാധുവായവരുടെ എണ്ണം ഇനിയുമുയരാനാണ് സാധ്യത.

ചൊവ്വാഴ്ചവരെയാണ് സംസ്ഥാനത്ത് മസ്റ്ററിങ്ങിന് അനുവദിച്ചിട്ടുള്ള സമയം. അസാധുവാക്കപ്പെട്ടവരുടെ കാര്യത്തില്‍ അതിനുശേഷമായിരിക്കും തീരുമാനമുണ്ടാകുക. വിരലടയാളം പൊരുത്തപ്പെടാത്തതിനാല്‍ മസ്റ്ററിങ് നടത്താന്‍ കഴിയാത്തവരുണ്ട്, ഇത്തരത്തിലുള്ളവരെ ഐറിസ് സ്‌കാനറിന്റെ സഹായത്തോടെ ഇവരുടെ കണ്ണടയാളം സ്വീകരിച്ച് മസ്റ്ററിങ് പൂര്‍ത്തിയാക്കേണ്ടിവരും. എന്നാല്‍, റേഷന്‍കടകളില്‍ ഐറിസ് സ്‌കാനറില്ലാത്തതിനാല്‍, മറ്റുമാര്‍ഗങ്ങള്‍ സ്വീകരിക്കാനാണു സാധ്യത.

Due to discrepancies in names between Aadhaar and ration cards, authorities have invalidated the ration card mustering process for lakhs of individuals. As a result, many people are temporarily losing access to their ration benefits. The government is expected to initiate new processes to rectify the issue and reinstate ration card services for the affected individuals.