കൊച്ചി: ചലച്ചിത്ര താരങ്ങളായ ശ്രീനാഥ് ഭാസിക്കും പ്രയാഗ മാര്‍ട്ടിനും ഗുണ്ടാനേതാവ് ഓംപ്രകാശിനെ മുന്‍പരിചയം ഇല്ലെന്ന് സ്ഥിരീകരിച്ച് പൊലിസ്. അതേസമയം, ലഹരി ഇടപാടുകളിലെ പ്രധാന കണ്ണിയായ ബിനു ജോസഫിന്റെയും ശ്രീനാഥ് ഭാസിയുടെയും സാമ്പത്തിക ഇടപാടുകളില്‍ പൊലിസിന് സംശയമുണ്ട്. ഇരുവരും തമ്മില്‍ ലഹരി ഇടപാട് നടന്നിട്ടുണ്ടോ എന്ന് പരിശോധിക്കും. എന്നാല്‍ പ്രയാഗയുടെ മൊഴിയില്‍ പൊരുത്തക്കേടുകള്‍ ഇല്ലെന്നും പൊലിസ് വ്യക്തമാക്കി. 

ഇന്നലെ ശ്രീനാഥ് ഭാസിയെ നാലര മണിക്കൂര്‍ പൊലിസ് ചോദ്യം ചെയ്തിരുന്നു. ശ്രീനാഥ് ഭാസിയുടെ മൊഴിയില്‍ ചില പൊരുത്തക്കേടുകള്‍ ഉള്ളതായാണ് സൂചന. താരങ്ങളുടെ ലഹരിപരിശോധന ഉടന്‍ നടത്തേണ്ടതില്ലെന്ന നിലപാടിലാണ് പൊലിസ്.

 ശ്രീനാഥ് ഭാസിയുടെയും പ്രയാഗ മാര്‍ട്ടിന്റെയും മൊഴിയുടെ വിശദാംശങ്ങള്‍ പുറത്ത് വന്നിട്ടുണ്ട്. വെളുപ്പിന് 4 മണിക്കാണ് ഇരുവരും ആഡംബര ഹോട്ടലില്‍ എത്തിയത്. 7മണിയോടെ ഇരുവരും മുറി വിട്ട് ഇറങ്ങി. ചോദ്യം ചെയ്തത് സി.സി.ടി.വി ദൃശ്യങ്ങള്‍ അടക്കം കാണിച്ചുകൊണ്ടാണ്. ഹോട്ടലില്‍ പോയത് ശ്രീനാഥ് ഭാസിയും ഫ്‌ളാറ്റിലുള്ള സുഹൃത്തുക്കളും ചേര്‍ന്ന് എന്ന് പ്രയാഗ മാര്‍ട്ടിന്‍ മൊഴി നല്‍കിയത്. അവിടെ ആരൊക്കെ ഉണ്ടെന്ന് അറിയില്ലായിരുന്നുവെന്നും വിശ്രമിക്കാന്‍ ഒരു മുറിയില്‍ മാത്രമാണ് കയറിയതെന്നും പ്രയാഗ മാര്‍ട്ടിന്‍ മൊഴി നല്‍കി.

ഓം പ്രകാശിനെ ഹോട്ടലില്‍ കണ്ടില്ലെന്നും പ്രയാഗ അന്വേഷണ സംഘത്തിന് മുന്‍പില്‍ മൊഴി നല്‍കി. ഇരുവരും കാക്കനാടുള്ള ഹോട്ടലിലെ ഡിജെ പാര്‍ട്ടിയില്‍ പങ്കെടുത്ത ശേഷമാണ് ആഡംബര ഹോട്ടലില്‍ എത്തിയത്. പ്രയാഗ അവിടെ നിന്നും രാവിലെ കോഴിക്കോടേക്ക് തിരിച്ചു. വാര്‍ത്തകള്‍ വന്ന ശേഷം ഓണ്‍ലൈനിലൂടെയാണ് ഓം പ്രകാശിനെ കുറിച്ച് അറിഞ്ഞത് എന്നും പ്രയാഗ പൊലിസിനോട് പറഞ്ഞു. പ്രയാഗയുടെ മൊഴി പൊലിസ് വിശ്വാസത്തില്‍ എടുത്തിട്ടുണ്ട്.

ഇരുവരുടെയും ഫോണ്‍ രേഖകള്‍ വിശദമായി പരിശോധിക്കും. റിമാന്‍ഡ് റിപ്പോര്‍ട്ടില്‍ പേരുള്ള മറ്റുള്ള ആളുകളുടെ മൊഴിയുമായി താരതമ്യം ചെയ്യും. പൊരുത്തക്കേട് കണ്ടെത്തിയാല്‍ മാത്രമേ ഇരുവരെയും വീണ്ടും വിളിപ്പിക്കുകയുള്ളൂ.

Police confirm no prior connection between actors Sreenath Bhasi, Prayaga Martin, and gang leader Om Prakash. Investigations continue into possible drug-related financial links with Bhasi. Read more details here