വാഷിങ്ടണ്‍: ഇസ്‌റാഈല്‍ ആക്രമണങ്ങള്‍ ഗസ്സയെ പൂര്‍ണമായും തകര്‍ത്തെറിഞ്ഞെന്ന് യു.എന്‍. ഗസ്സന്‍ സമ്പദ് വ്യവസ്ഥ പഴയ നിലയിലേക്ക് തിരിച്ചെത്താന്‍ 350 വര്‍ഷമെടുക്കുമെന്നും യു.എന്‍ റിപ്പോര്‍ട്ടില്‍ പറയുന്നു. 

യുദ്ധത്തിന് മുമ്പ് തന്നെ ഗസ്സയിലെ സാമ്പത്തിക പ്രവര്‍ത്തനങ്ങള്‍ വലിയ തകര്‍ച്ചയെ അഭിമുഖീകരിച്ചിരുന്നു. പിന്നാലെ ഇസ്‌റാഈല്‍ അധിനിവേശത്തോടെ സാമ്പത്തിക പ്രവര്‍ത്തനങ്ങള്‍ പൂര്‍ണമായും നിലച്ചു. കടുത്ത കുടിവെള്ള, ഇന്ധന, വൈദ്യുതി ക്ഷാമം ഗസ്സയെ വലച്ചു. ഭക്ഷ്യവസ്തുക്കളും ആരോഗ്യസേവനങ്ങളും പോലും ഗസ്സക്ക് ലഭിക്കാതെയായി.

യു.എന്നിന്റെ കണക്കുകള്‍ പ്രകാരം നിര്‍മാണ പ്രവര്‍ത്തനങ്ങള്‍ 96 ശതമാനം ഇടിഞ്ഞു. കാര്‍ഷിക പ്രവര്‍ത്തനങ്ങളില്‍ 93 ശതമാനവും സേവനമേഖലയില്‍ 76 ശതമാനവും ഇടിവുണ്ടായി. ഗസ്സയിലെ തൊഴിലില്ലായ്മ 2024 സാമ്പത്തിക വര്‍ഷത്തിന്റെ ആദ്യപാദത്തില്‍ 81.7 ശതമാനമായി ഉയര്‍ന്നു. ഗസ്സയിലെ ഇസ്‌റാഈല്‍ അധിനിവേശം ഇനിയും തുടരുകയാണെങ്കില്‍ സ്ഥിതി വീണ്ടും രൂക്ഷമാകുമെന്നും യു.എന്‍ മുന്നറിയിപ്പ് നല്‍കുന്നു.

ഗസ്സയിലെ 88 ശതമാനം സ്‌കൂളുകളും തകര്‍ക്കപ്പെട്ടിരിക്കുന്നു. 36 ആശുപത്രികളില്‍ 21 എണ്ണവും പ്രവര്‍ത്തിക്കുന്നില്ല. പ്രാഥമിക ആരോഗ്യകേന്ദ്രങ്ങളില്‍ 105 എണ്ണത്തില്‍ 45 എണ്ണമാണ് പ്രവര്‍ത്തിക്കുന്നത്. 62 ശതമാനം വീടുകളും തകര്‍ക്കപ്പെട്ടു. 59 ശതമാനം കുടിവെള്ള വിതരണ സംവിധാനങ്ങളും അഴുക്കുചാലുകളും തകര്‍ക്കപ്പെട്ടുവെന്നും യു.എന്‍ റിപ്പോര്‍ട്ടില്‍ ചൂണ്ടിക്കാട്ടുന്നു.

വെടിനിര്‍ത്തല്‍ കരാര്‍ യാഥാര്‍ഥ്യമായാലും 2007 മുതല്‍ 2022 വരെയുള്ള അവസ്ഥയിലേക്ക് ഗസ്സയുടെ സമ്പദ് വ്യവസ്ഥ എത്തണമെങ്കില്‍ 350 വര്‍ഷം വേണ്ടി വരുമെന്നും യു.എന്‍ റിപ്പോര്‍ട്ട് ചൂണ്ടിക്കാട്ടുന്നു.

A UN report states that Israeli attacks have completely devastated Gaza, predicting that it could take 350 years for the region's economy to recover to its previous state.