ആലപ്പുഴ:  ഹൗസിംഗ് സഹകരണ സംഘത്തില്‍ ഇടപാടു നടത്തുന്നതിനായി ഈടുവച്ച ആധാരം തിരികെ ലഭ്യമാക്കാനുള്ള നടപടി സ്വീകരിക്കണമെന്ന് ആവശ്യപ്പെട്ട് ഇടപാടുകാര്‍ രംഗത്ത്.
തത്തംപള്ളിയില്‍ പ്രവര്‍ത്തിക്കുന്ന ഹൗസിംഗ് സഹകരണ സംഘത്തിലെ ഇടപാടുകാരാണ് വായ്പാ തുക തിരികെ നല്‍കിയിട്ടും ഈടു നല്‍കിയ ആധാരങ്ങള്‍ തിരികെ ലഭിക്കാത്തതിനെ തുടര്‍ന്ന് പരാതിയുമായി രംഗത്തെത്തിയത്. 20,000 മുതല്‍ മൂന്നു ലക്ഷം വരെ വായ്പയെടുത്ത 120 ഓളം ഇടപാടുകാര്‍ക്കാണ് ആധാരങ്ങള്‍ ലഭിക്കാനുള്ളത്. സൊസൈറ്റി നിബന്ധന പ്രകാരം വായ്പയും പലിശയും തിരിച്ചടച്ച് ഇടപാടു പൂര്‍ത്തിയാക്കിയെങ്കിലും ആധാരം തിരികെ ലഭിക്കാത്തതിനെത്തുടര്‍ന്ന് നടത്തിയ അന്വേഷണത്തില്‍ സൊസൈറ്റിയില്‍ ഈടു നല്‍കിയ ആധാരങ്ങള്‍ എറണാകുളം ആസ്ഥാനമായ ഹൗസിംഗ് ഫെഡറേഷനില്‍ പണയപ്പെടുത്തി സൊസൈറ്റി അധികൃതര്‍ പണം വാങ്ങിയതായി ബോധ്യപ്പെട്ടു. എന്നാല്‍ ഈ വായ്പ തുക സൊസൈറ്റി അധികൃതര്‍ തിരിച്ചടച്ചതുമില്ല.
ഹൗസിംഗ് ഫെഡറേഷന്‍ നല്‍കിയ വായ്പയും പലിശയും തിരിച്ചടച്ചാല്‍ ആധാരങ്ങള്‍ നല്കാമെന്നാണ് ഇടപാടുകാര്‍ക്ക് അന്വേഷണത്തില്‍ അറിയാന്‍ കഴിഞ്ഞത്. അതേസമയം മുതലും പലിശയും സഹിതം സൊസൈറ്റിയില്‍ ഇടപാടുകാര്‍ പൂര്‍ണമായും വായ്പതുക അടച്ച് തീര്‍ത്തതുമാണ്. സൊസൈറ്റിയിലെ ക്രമക്കേടുകള്‍ സംബന്ധിച്ച് അധികാരികള്‍ക്ക് പരാതി നല്‍കിയതിന്റെ  അടിസ്ഥാനത്തില്‍ 2011ല്‍ സൊസൈറ്റിയുടെ പ്രവര്‍ത്തനം സര്‍ക്കാര്‍ മരവിപ്പിച്ചിരിക്കുകയാണ്. സംഭവത്തെക്കുറിച്ച് വകുപ്പ് തല അന്വേഷണം പ്രഖ്യാപിച്ചിരുന്നുവെങ്കിലും യാതൊരു നടപടിയും ഉണ്ടായതായി അറിയില്ലെന്നും ഇടപാടുകാര്‍ പറയുന്നു. ഈ സാഹചര്യത്തില്‍ സംഭവത്തെക്കുറിച്ച് വിജിലന്‍സ് അന്വേഷണത്തിന് പരാതി നല്‍കാനൊരുങ്ങുകയാണ് ഇടപാടുകാര്‍.
ഇതോടൊപ്പം ഭാവി സമരപരിപാടികള്‍ക്കും തയാറെടുക്കുകയാണെന്ന് ആം ആദ്മി അഴിമതി വിരുദ്ധ സമിതി ഭാരവാഹികളായ ലാല്‍മാത്യു, എം.കെ ഷാജി, നാസര്‍ ആറാട്ടുവഴി, മത്തായി മാളികമുക്ക്, ബാബു ഓമനപ്പുഴ എന്നിവര്‍ വാര്‍ത്തസമ്മേളനത്തില്‍  പറഞ്ഞു.