കാവാലം: തട്ടാശേരി കെ.എസ്.ആര്‍.ടി.സി ബസ്സ്റ്റാന്റില്‍ മദ്യപാനം നടത്തിയ സി.പി.എം, ഡി.വൈ.എഫ്.ഐ നേതാക്കളെ പൊലിസ് പിടികൂടി.
സി.പി.എം കാവാലം ലോക്കല്‍ സെക്രട്ടറി ജോഷി, ഡി.വൈ.എഫ്.ഐ കുട്ടനാട് ബ്ലോക്ക് നേതാവ് വിനോദ്, പ്രവര്‍ത്തകരായ സാബു, ഷാജി എന്നിവരെയാണ് കൈനടി പൊലിസ് അറസ്റ്റു ചെയ്തത്. സംഭവത്തെ പറ്റി പൊലിസ് പറയുന്നത് ഇങ്ങനെ. കാവാലം തട്ടാശേരി പ്രദേശത്ത് രാത്രികാലത്ത് സ്ഥിരമായി സാമൂഹ്യ വിരുദ്ധ ശല്യവും പൊതു സ്ഥലത്ത് പരസ്യ മദ്യപാനവും നടക്കുന്നുണ്ടെന്ന് നാട്ടുകാര്‍ പരാതി പറഞ്ഞിരുന്നു. ബുധനാഴ്ച മഫ്തിയിലാണ് പൊലിസ് പരിശോധനയക്ക് എത്തിയതും സംഘത്തെ പിടികൂടിയതും.
സംഘത്തിലെ രണ്ടു പേരെ പിടികൂടിയപ്പോള്‍ എല്‍.സി സെക്രട്ടറി ഓടി രക്ഷപെട്ടന്നു പൊലിസ് പറഞ്ഞു. തുടര്‍ന്ന് ഡി.വൈ.എഫ്.ഐ നേതാവിനെയും മറ്റു രണ്ടു പേരെയും പൊലിസ് സ്റ്റേഷനിലേക്ക് കൊണ്ടു പോവുകയായിരുന്നു. തുടര്‍ന്ന് പൊലിസിന്റെ സമ്മര്‍ദ്ദത്തെ തുടര്‍ന്ന് ജോഷി രാത്രി വൈകി സ്റ്റേഷനില്‍ എത്തി കീഴടങ്ങുകയായിരുന്നു വെന്നും പൊലീസ് പറഞ്ഞു. തുടര്‍ന്ന് നാലു പേരെയും ജാമ്യത്തില്‍ വിട്ടയച്ചു. പൊതു സ്ഥലത്ത് പരസ്യ മദ്യപാനം നടത്തിയതിന് നാലു പേര്‍ക്കെതിരെയും കേസ് എടുത്തിട്ടുണ്ടെന്ന് കൈനടി പൊലിസ് അറിയിച്ചു. ഇതിനിടെ നേതാക്കളെ പിടികൂടിയ എസ്.ഐയ്ക്ക് നേരെ സ്ഥലമാറ്റ ഭീഷണിയുമായി പ്രാദേശിക നേതൃത്വം രംഗത്തെത്തിയിട്ടുണ്ട്.