വെള്ളനാട്: ബസുകളുടെ എണ്ണക്കുറവ് മൂലം വെള്ളനാട് കെ.എസ്.ആര്‍.ടി.സി ഡിപ്പോയില്‍ ദിവസവും മടങ്ങുന്നത് ഇരുപതിലധികം സര്‍വീസുകള്‍.ഇതുമൂലം യാത്രാക്ലേശം രൂക്ഷമായിരിക്കുകയാണ്.
പ്രതിദിനം 64 ഷെഡ്യൂളുകളുള്ള ഡിപ്പോയില്‍ നിന്ന് 45 സര്‍വീസുകളില്‍ താഴെ മാത്രമേ നിരത്തിലിറങ്ങാറുള്ളൂ. മലയോര മേഖലകളിലേക്കുള്ള സര്‍വീസുകളാണ് കൂടുതലും മുടങ്ങുന്നത്. ഡിപ്പോയില്‍ ഇപ്പോള്‍ 54 ബസുകളാണുള്ളത്. ഇതില്‍ ഏഴെണ്ണം കട്ടപ്പുറത്താണ്. മൂന്ന് ജനറം ബസില്‍ തകരാറിലായ ഒന്ന് സെന്‍ട്രല്‍ ഡിപ്പോയില്‍ കൊണ്ടുപോയിട്ട് രണ്ട് മാസത്തോളമായി.സ്‌പെയര്‍പാര്‍ട്‌സുകളുടെ അഭാവവും സര്‍വീസുകള്‍ തടസ്സപ്പെടുന്നതിന് കാരണമായിട്ടുണ്ട്.
പുതുതായി 10 ബസുകള്‍ കൂടി അനുവദിച്ചാല്‍ മാത്രമേ സര്‍വീസുകള്‍ മുടക്കം കൂടാതെ നടത്താനാകൂവെന്ന് ഡിപ്പോ അധികൃതര്‍ പറയുന്നു. സര്‍വീസുകള്‍ മുടക്കമില്ലാതെ
നടന്നിരുന്ന ഡിപ്പോയിലാണ് ബസുകളുടെ എണ്ണക്കുറവ് കാരണം യാത്രാക്ലേശമുണ്ടായിരിക്കുന്നത്.
ഇരുപത് മിനിട്ട് ഇടവേളകളില്‍ സര്‍വീസ് നടത്തുന്ന കാട്ടാക്കട-വെള്ളനാട്-നെടുമങ്ങാട് ചെയിന്‍സര്‍വീസുകള്‍ സമയക്രമം പാലിക്കാത്തതും യാത്രക്കാരെ ബുദ്ധിമുട്ടിലാക്കുന്നുണ്ട്. ചിലപ്പോള്‍ ഒരു മണിക്കൂര്‍ കാത്ത് നിന്നാലും ചെയിന്‍ സര്‍വീസുകള്‍ ലഭിക്കാത്ത സാഹചര്യമാണെന്നും യാത്രക്കാര്‍ പറയുന്നു.
ഡിപ്പോയുടെ ശോച്യാവസ്ഥയ്ക്ക് പരിഹാരം കാണുന്നതില്‍ ജനപ്രതിനിധികള്‍ ഇടപെടുന്നില്ലെന്ന് ആക്ഷേപമുണ്ട്. അടിയന്തിരമായി പുതിയ ബസുകള്‍ അനുവദിച്ച് സര്‍വീസുകള്‍ മുടങ്ങാതിരിക്കുന്നതിന് വേണ്ട നടപടികള്‍ അധികൃതരുടെ ഭാഗത്ത് നിന്നുണ്ടാകണമെന്നാണ് യാത്രക്കാരുടെ ആവശ്യം.