റായ്‌പൂർ: ഛത്തീസ്ഗഢിലെ കാങ്കറിൽ മാവോയിസ്റ്റുകൾ സ്ഥാപിച്ച ഐ.ഇ.ഡി (കുഴിബോംബ്) പൊട്ടിത്തെറിച്ച് നാല് ഡി.ആർ.ജി (ഡിസ്ട്രിക്ട് റിസേർവ് ഗാർഡ്‌) ജവാന്മാർക്ക് വീരമൃത്യു. നാരായൺപൂർ അതിർത്തിയോട് ചേർന്നുള്ള വനമേഖലയിൽ മൈൻ ക്ലിയറൻസ് ഓപ്പറേഷൻ നടത്തുന്നതിനിടെയായിരുന്നു ദാരുണമായ സംഭവം. മാവോയിസ്റ്റുകൾ ഒളിപ്പിച്ച സ്ഫോടകവസ്തുക്കൾ കണ്ടെത്തി നശിപ്പിക്കാനുള്ള ശ്രമത്തിനിടെയാണ് പൊട്ടിത്തെറിയുണ്ടായത്.

ഇൻസ്‌പെക്ടർ സുഖ്‌റാം വട്ടി, കോൺസ്റ്റബിൾ കൃഷ്ണ കോംറ, കോൺസ്റ്റബിൾ സഞ്ജയ് ഗാധ്‌പാലെ, കോൺസ്റ്റബിൾ പരമാനന്ദ് കൊറാം എന്നിവരാണ് വീരമൃത്യു വരിച്ചത്.

ഇൻസ്‌പെക്ടർ സുഖ്‌റാം വട്ടി ഉൾപ്പെടെയുള്ള ആദ്യ മൂന്ന് പേരും സംഭവസ്ഥലത്ത് വെച്ച് തന്നെ മരണപ്പെട്ടു. ഗുരുതരമായി പരുക്കേറ്റ കോൺസ്റ്റബിൾ പരമാനന്ദ് കൊറാമിനെ ഉടൻ തന്നെ ഹെലികോപ്റ്റർ മാർഗ്ഗം റായ്‌പൂരിലെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.

ഈ വർഷം മാർച്ച് 31-ന് ഇന്ത്യയെ 'നക്സൽ വിമുക്ത' രാജ്യമായി കേന്ദ്രസർക്കാർ ഔദ്യോഗികമായി പ്രഖ്യാപിച്ചിരുന്നു. ഇതിന് ശേഷം റിപ്പോർട്ട് ചെയ്യപ്പെടുന്ന ആദ്യത്തെ വലിയ സ്ഫോടനമാണിത് എന്ന പ്രത്യേകതയുമുണ്ട്. 2015 മുതൽ സുരക്ഷാ സേന നടത്തിയ ശക്തമായ നീക്കങ്ങൾക്കൊടുവിൽ ഏപ്രിൽ 8-ന് രാജ്യത്തെ ഒരു ജില്ലയും 'നക്സൽ ബാധിത' പട്ടികയിൽ ഇല്ലെന്ന് കേന്ദ്രം വ്യക്തമാക്കിയിരുന്നു.

പഴയ 'നക്സൽ ബാധിത' പട്ടികയ്ക്ക് പകരം 'ലെഗസി ആൻഡ് ത്രസ്റ്റ് ഡിസ്ട്രിക്ട്സ്' എന്ന പുതിയ വർഗ്ഗീകരണമാണ് നിലവിൽ ആഭ്യന്തര മന്ത്രാലയം നടപ്പിലാക്കിയിരിക്കുന്നത്. നക്സൽ സ്വാധീനം കുറഞ്ഞ പ്രദേശങ്ങളിൽ വികസനം ഉറപ്പാക്കാനും അക്രമങ്ങൾ തിരിച്ചുവരാതിരിക്കാനുമാണ് ഈ നീക്കം. നിലവിൽ ഈ പട്ടികയിൽ ഉൾപ്പെട്ടിട്ടുള്ള 37 ജില്ലകളിൽ ജാർഖണ്ഡിലെ പശ്ചിമ സിംഗ്ഭും മാത്രമാണ് കൂടുതൽ ജാഗ്രത ആവശ്യമായ മേഖല.

ഛത്തീസ്ഗഢ്, കേരളം ഉൾപ്പെടെയുള്ള ഒൻപത് സംസ്ഥാനങ്ങളിലെ 38 ജില്ലകളിൽ നിലവിൽ ശക്തമായ നിരീക്ഷണവും വികസന പ്രവർത്തനങ്ങളും തുടരുകയാണ്. സായുധ പോരാട്ടങ്ങളിൽ നിന്ന് പൂർണ്ണമായ സമാധാനത്തിലേക്കും വികസനത്തിലേക്കും രാജ്യം ചുവടുവെക്കുന്നതിനിടെയുണ്ടായ ഈ സ്ഫോടനം സുരക്ഷാ സേനയെ വീണ്ടും അതീവ ജാഗ്രതയിലാക്കിയിട്ടുണ്ട്.

four jawans of the district reserve guard (drg) were killed in a landmine explosion triggered by maoists in chhattisgarh's kanker district. the tragic incident occurred on saturday during a mine clearance operation near the narayanpur border.