തിരുവല്ല: നഗരത്തിലെ പ്രമുഖ ആഡംബര ഹോട്ടലിൽ നിന്നും വിളമ്പിയ ഭക്ഷണത്തിൽ ചത്ത പാറ്റയെ കണ്ടെത്തിയതായി പരാതി. ചങ്ങനാശ്ശേരിയിൽ നിന്നും കൊട്ടാരക്കരയിലേക്ക് യാത്ര ചെയ്യുന്നതിനിടെ തിരുവല്ല ഇടിഞ്ഞില്ലത്തുള്ള അർക്കാഡിയ ഹോട്ടലിൽ ഭക്ഷണം കഴിക്കാനിറങ്ങിയ കൃഷി വകുപ്പ് ഉദ്യോഗസ്ഥൻ ബിജു വിനായകനാണ് ദുരനുഭവം ഉണ്ടായത്. ഇന്ന് ഉച്ചകഴിഞ്ഞ് മൂന്നരയോടെയായിരുന്നു സംഭവം.

രണ്ട് പൊറോട്ടയും ബീഫ് കറിയുമാണ് ബിജു ഓർഡർ ചെയ്തിരുന്നത്. ആദ്യ പൊറോട്ട കഴിച്ച ശേഷം രണ്ടാമത്തെ പൊറോട്ടയിലേക്ക് കറി ഒഴിച്ചപ്പോഴാണ് കറിക്കുള്ളിൽ ചത്ത നിലയിൽ പാറ്റയെ കണ്ടത്. ഉടൻ തന്നെ ജീവനക്കാരെയും ഹോട്ടൽ മാനേജരെയും വിവരം അറിയിച്ചു. പരാതിപ്പെട്ടതിനെ തുടർന്ന് മാനേജർ നേരിട്ടെത്തി പാറ്റയെ കണ്ട കാര്യം സമ്മതിക്കുകയും ചെയ്തു.

ഭക്ഷണം കഴിച്ചതിന് പിന്നാലെ ശാരീരിക അസ്വസ്ഥതയും ഛർദ്ദിയും അനുഭവപ്പെട്ട ബിജു അരമണിക്കൂറോളം ഹോട്ടലിൽ തന്നെ ഇരുന്നു. എന്നാൽ, ഇതിനിടെ ഹോട്ടൽ അധികൃതർ നിലപാട് മാറ്റിയതായി ബിജു ആരോപിക്കുന്നു. ഭക്ഷണത്തിൽ പാറ്റയെ ബിജു തന്നെ ഇട്ടതാണെന്ന തരത്തിൽ ജീവനക്കാർ സംസാരിക്കാൻ തുടങ്ങിയതോടെ തർക്കം രൂക്ഷമായി.

ഭക്ഷണത്തിന് ബില്ല് നൽകാൻ ഹോട്ടൽ അധികൃതർ ആദ്യം തയ്യാറായില്ലെങ്കിലും ബിജു നിർബന്ധപൂർവ്വം പണമടച്ച് രസീത് വാങ്ങി. തുടർന്ന് പെരിങ്ങര പഞ്ചായത്തിലെ ഭക്ഷ്യസുരക്ഷാ വിഭാഗം ഉദ്യോഗസ്ഥരെ വിവരം അറിയിക്കുകയും ഔദ്യോഗികമായി പരാതി നൽകുകയും ചെയ്തു. സംഭവത്തിൽ ഭക്ഷ്യസുരക്ഷാ വകുപ്പ് അന്വേഷണം ആരംഭിച്ചിട്ടുണ്ട്.

An agriculture department official filed a complaint after discovering a dead cockroach in a beef curry served at a luxury hotel in Thiruvalla. The incident occurred while Biju Vinayakan was traveling from Changanassery to Kottarakkara.