മനാമ: പ്രായം 69, കുട്ടിക്കാലം മുതലുള്ള തള്ളവിരലിനേറ്റ പരിക്ക്, വളഞ്ഞ കൈമുട്ട്, കാല്‍മുട്ടിലെ വേദനയും പ്രശ്‌നങ്ങളും, തോളില്‍ ശസ്ത്രക്രിയ... എന്നിട്ടും ഇതൊന്നും അയാളെ തളര്‍ത്തിയില്ല. പ്രായത്തെയും ശാരീരിക വെല്ലുവിളികളെയും അതിജീവിച്ച് ബഹ്‌റൈനില്‍ നടന്ന അയണ്‍മാന്‍ 70.3 ചാലഞ്ച് പൂര്‍ത്തിയാക്കുമ്പോള്‍ പൂനെയില്‍ നിന്നുള്ള 69 കാരനായ നവ്‌നാഥ് സാന്‍ജൂണ്‍ കുറിച്ചത് പുതിയ റെക്കോഡ്. കടലില്‍ 1.9 കിലോമീറ്റര്‍ നീന്തല്‍, കരയിലൂടെ 89 കിലോമീറ്റര്‍ സൈക്ലിങ്, 21 കിലോമീറ്റര്‍ ഓട്ടം എന്നിവ ഉള്‍പ്പെടുന്ന ട്രയാത്ത്‌ലോണ്‍ ആണ് 69 മത്തെ വയസ്സില്‍ സാന്‍ജൂണ്‍ വിജയകരമായി പൂര്‍ത്തിയാക്കിയത്. (69 year Navnath Zanjurne successfully completed the Bahrian triathlon, which included a 1.9-kilometer swim in the ocean, an 89-kilometer cycle on land, and a 21-kilometer run). 

 

നവ്‌നാഥ് സാന്‍ജൂണ്‍

മൂന്ന് വര്‍ഷത്തെ കഠിന പരിശീലനത്തിന് ശേഷം തുര്‍ക്കിയില്‍ പരാജയം നേരിട്ട സാന്‍ജൂണ്‍ സ്വയം തിരിച്ചുവരാനെടുത്ത തീരുമാനമാണ് അദ്ദേഹത്തെ വിജയിയാക്കിയത്. ലക്ഷ്യംകൈവരിക്കുന്നതിനായി സാന്‍ജൂണ്‍ ഒഴുക്കിയ വിയര്‍പ്പിന് പരിധിയില്ല. നിശ്ചയദാര്‍ഢ്യത്തോടെ ലക്ഷ്യം പിന്തുടര്‍ന്നു. അദ്ദേഹത്തിന്റെ സ്ഥിരോത്സാഹത്തിന് ഫലമുണ്ടായി, ഇന്ത്യയുടെ ഏറ്റവും പ്രായം കൂടിയ ഉരുക്കുമനുഷ്യനായതില്‍ സാന്‍ജൂണ്‍ ഇപ്പോള്‍ അഭിമാനിക്കുന്നു, ഒപ്പം അദ്ദേഹത്തിന്റെ കുടുംബവും.

കോച്ച് ചൈതന്യ വെല്‍ഹാലിന്റെ മാര്‍ഗനിര്‍ദേശപ്രകാരം സാന്‍ജൂണ്‍ തന്റെ ശാരീരിക ബലഹീനതകള്‍ തിരിച്ചറിയുകയും മെച്ചപ്പെടുത്തുകയും ചെയ്തു. ജിം പരിശീലകനായ ഹേമന്തിനുമായുള്ള പതിവ് സെഷനുകളാണ് പേശികളുടെ ശക്തി വീണ്ടെടുക്കാന്‍ അദ്ദേഹത്തെ സഹായിച്ചത്. കോവിഡ് മഹാമാരിക്ക് മുമ്പ് അദ്ദേഹത്തിന്റെ ഭാരം 90 കിലോയില്‍ നിന്ന് 65 കിലോയിലേക്ക് മാറിയതും വിജയത്തില്‍ നിര്‍ണായക പങ്ക് വഹിച്ചു.

തന്റെ കുടുംബത്തിന്റെ അചഞ്ചലമായ പിന്തുണയും സാന്‍ജൂണിന് ലഭിച്ചു. കര്‍ശനമായ ഭക്ഷണ പരിപാലന രീതിയാണ് അദ്ദേഹം പിന്തുടര്‍ന്നത്. ഇക്കാര്യത്തില്‍ ഭാര്യ ഉഷക്ക് അദ്ദേഹം 100 മാര്‍ക്ക് നല്‍കുന്നു. മകന്‍ ഡോ. രാഹുല്‍ ആണ് മാനസിക തയ്യാറെടുപ്പിന് സഹായിച്ചത്. വിജയിക്കാനുള്ള സാന്‍ജൂണിന്റെ കഴിവില്‍ വിശ്വസമര്‍പ്പിക്കാന്‍ മകന്‍ അദ്ദേഹത്തെ പ്രേരിപ്പിച്ചു.

മുമ്പ് അഞ്ച് തവണ അയണ്‍മാന്‍ ചാലഞ്ചില്‍ പങ്കെടുത്ത മരുമകള്‍ ഡോ. സ്മിതയും അദ്ദേഹത്തെ പ്രോത്സാഹിപ്പിച്ചു. കൊച്ചുമക്കളായ സായിബായിയും ശിവബയും കൂടെ ഓടി മുത്തച്ചനെ പ്രോത്സാഹിപ്പിച്ചു കൊണ്ടിരുന്നു. പ്ലക്കാര്‍ഡുകള്‍ പിടിച്ച് മുത്തച്ചന് വേണ്ടി കൈയടിച്ച് കൊണ്ടിരുന്നു.

വ്യക്തമായ ലക്ഷ്യത്തോടെയും നിശ്ചയദാര്‍ഢ്യത്തോടെയും ഒരാള്‍ക്ക് വിജയം നേടാനാകുമെന്ന എന്റെ വിശ്വാസത്തെ ഈ മത്സരം ഒന്നുകൂടി ഉറപ്പിച്ചതായി സാന്‍ജൂണ്‍ പറഞ്ഞു. ഈ പ്രായത്തിലും വലിയ ശാരീരിക വെല്ലുവിളികള്‍ക്കിടയിലും വിജയം എപ്പോഴും സാധ്യമാണെന്ന് വിശ്വസിക്കാന്‍ യുവതലമുറയെ പ്രചോദിപ്പിക്കുന്നതില്‍ എനിക്ക് സന്തോഷമുണ്ട്. എന്റെ കുടുംബത്തിന്റെയും പരിശീലകരുടെയും പ്രയത്‌നവും പിന്തുണയും ഒരിക്കലും മറക്കാനാകില്ല- സാന്‍ജൂണ്‍ പറഞ്ഞു.

69-year Indian man finishes Half Ironman race in Bahrain