നീലേശ്വരം: അഴിത്തലയില്‍ മത്സ്യബന്ധന ബോട്ട് തിരമാലയില്‍പെട്ട് തകര്‍ന്നു. തൈക്കടപ്പുറം ബോട്ടുജെട്ടിയില്‍ നിന്ന് ഇന്നലെ രാവിലെ മത്സ്യബന്ധനത്തിനു പുറപ്പെട്ട പ്രണവം ബോട്ടാണു തകര്‍ന്നത്. അഴിമുഖം കടന്നയുടനെ കൂറ്റന്‍ തിരമാലയില്‍പെട്ട് ബോട്ട് തകരുകയായിരുന്നു. ബോട്ടിലുണ്ടായിരുന്ന മത്സ്യതൊഴിലാളികളായ പി.വി സത്യന്‍, പി.വി പവനന്‍, സരീഷ്, ഒ സുനില്‍ എന്നിവര്‍ കടലിലേക്കു തെറിച്ചു വീണു. ഇവരെ മറ്റു ബോട്ടുകളിലെത്തിയ തൊഴിലാളികള്‍ രക്ഷിച്ചു നീലേശ്വരം താലൂക്ക് ആശുപത്രിയില്‍ പ്രവേശിപ്പിച്ചു. തിരമാലകളില്‍ പെട്ട് ബോട്ടിന്റെ പലകകളെല്ലാം ഇളകി കടലില്‍ വീണു.
ക്രെയിന്‍ ഉപയോഗിച്ച് എന്‍ജിനും പ്രൊപ്പല്ലറും കരയ്‌ക്കെത്തിക്കുകയായിരുന്നു. ഒന്‍പതു ലക്ഷം രൂപയുടെ നഷ്ടം കണക്കാക്കുന്നു. നീലേശ്വരം നഗരസഭാ അധികൃതരും പൊലിസും സ്ഥലത്തെത്തി.