സുല്‍ത്താന്‍ ബത്തേരി: മഴയുടെ ലഭ്യതയിലെ ഗണ്യമായ കുറവ് ജില്ലയില്‍ കൊടും വരള്‍ചക്കു കാരണമാകുമെന്നിരിക്കെ ജല സംരക്ഷണ പ്രവര്‍ത്തനങ്ങള്‍ക്ക് അടിയന്തര ഊന്നല്‍ നല്‍കണമെന്ന് ആവശ്യം.
കഴിഞ്ഞ രണ്ടു വര്‍ഷമായി ജില്ലയില്‍ കാലവര്‍ഷം ഗണ്യമായി കുറയുന്ന സാഹചര്യത്തിലാണ് ഈ ആവശ്യമുയരുന്നത്.
ചെക്ക്ഡാമുകളും കനാലുകളും സംരക്ഷിച്ചു ജലസംരക്ഷണം സാധ്യമാക്കിയില്ലെങ്കില്‍ വരും വേനലുകളില്‍ ജില്ല കൊടിയ വരള്‍ച നേരിടേണ്ടിവരും. നിലവില്‍ ജല സംരക്ഷണത്തിന് ജില്ലയില്‍ കാര്യമായ സംവിധാനങ്ങളില്ലാത്ത സ്ഥിതിയാണ്. നൂറുകണക്കിനു കനാലുകളും ചെക്ക്ഡാമുകളും നിര്‍മിച്ചിട്ടുണ്ടെങ്കിലും ഇതെല്ലാം നാശത്തിന്റെ വക്കിലാണ്. കൂടാതെ ജില്ലയിലെ വരള്‍ച പ്രതിരോധിക്കാന്‍ കഴിയുന്നവയുമല്ല. ചെക്ക്ഡാമുകളുടേയും കനാലുകളുടേയും നാശം കര്‍ഷകരേയും പ്രതികൂലമായി ബാധിച്ചിരിക്കുകയാണ്. ഏക്കറുകണക്കിന് പാടങ്ങളും കൃഷിയിടങ്ങളുമാണ് വെള്ളം ലഭ്യമല്ലാത്തതിനാല്‍ ജില്ലയിലെ വിവിധയിടങ്ങളിലായി തരിശിട്ടിരിക്കുന്നത്. എന്നാല്‍ ചെക്ക്ഡാമുകളും കനാലുകളും നന്നാക്കി കര്‍ഷകര്‍ക്ക് പ്രയോജനപ്പെടുത്താന്‍ അധികൃതരുടെ ഭാഗത്ത് നിന്ന് യാതൊരു നടപടിയും ഉണ്ടായിട്ടില്ല. നിലവിലുള്ള ചെക്ക്ഡാമുകളും കനാലുകളും സംരക്ഷിച്ച് ലഭിക്കുന്ന മഴവെള്ളം തടഞ്ഞുനിറുത്തി ജില്ലയെ വരാനിരിക്കുന്ന വലിയ വിപത്തില്‍ നിന്നും രക്ഷിക്കാന്‍ സര്‍ക്കാര്‍ തയാറാവണമെന്നാണ് ആവശ്യമുയരുന്നത്.