ന്യൂഡൽഹി: ഡൽഹി നിയമസഭാ തെരഞ്ഞെടുപ്പിനുള്ള ആദ്യഘട്ട സ്ഥാനാർഥി പട്ടിക പുറത്തിറക്കി ബിജെപി. പർവേഷ് വർമ്മ, രമേഷ് ബിധുരി, മഞ്ജീന്ദർ സിംഗ് സിർസ തുടങ്ങിയ പ്രമുഖ നേതാക്കളാണ് ആദ്യ പട്ടികയിലുള്ളത്.

ബിജെപി പുറത്തുവിട്ട ആദ്യ പട്ടികയിൽ 29 സ്ഥാനാർഥികളാണുള്ളത്. 70 മണ്ഡലങ്ങളാണ് സംസ്ഥാനത്തുള്ളത്.  പട്ടികയനുസരിച്ച് ന്യൂഡൽഹി മണ്ഡലത്തിൽ മുൻ മുഖ്യമന്ത്രിയും ആം ആദ്‌മി പാർട്ടി കൺവീനറുമായ അരവിന്ദ് കെജ്‌രിവാളിനെതിരെ മുൻ എംപി പർവേഷ് വർമയാണ് മത്സരിക്കുന്നത്.

നിലവിലെ മുഖ്യമന്ത്രി അതിഷിക്കെതിരെ കൽകജി മണ്ഡലത്തിൽ നിന്ന് ബിജെപി നേതാവും സൗത്ത് ഡൽഹിയിൽ നിന്നുള്ള മുൻ എംപിയുമായ രമേഷ് ബിധുരി മത്സരിക്കും. ഇതോടെ കൽകജിയിൽ വാശിയേറിയ പോരാട്ടമാണെന്ന് ഉറപ്പായി. മുൻ എഎപി നേതാവ് കൂടിയായ അൽക്ക ലാംബയെയാണ് ഇവിടെ കോൺഗ്രസ് സ്ഥാനാർത്ഥി.

ആം ആദ്‌മി പാർട്ടിയിൽ നിന്നും രാജിവെച്ച് ബിജെപിയിൽ ചേർന്ന കൈലാഷ് ഗെലോട്ട് ബിജ്വാസൻ സീറ്റിൽ മത്സരിക്കും. മുൻ കോൺഗ്രസ് നേതാവും ഷീലാ ദീക്ഷിത് സർക്കാരിൽ മന്ത്രിയുമായിരുന്ന അരവിന്ദർ സിങ് ലവ്‌ലി ഈസ്റ്റ് ഡൽഹിയിലെ ഗാന്ധിനഗർ സീറ്റിൽനിന്ന് ബിജെപിക്കായി മത്സരിക്കും. കഴിഞ്ഞ വർഷമാണ് അരവിന്ദർ സിങ് കോൺഗ്രസ് വിട്ടത്. ഫെബ്രുവരിയിലാകും തെരഞ്ഞെടുപ്പ്. ആം ആദ്‌മി പാർട്ടി മുഴുവൻ സ്ഥാനാർഥികളേയും പ്രഖ്യാപിച്ച് നേരത്തെ തന്നെ പ്രചാരണം തുടങ്ങിയിരുന്നു.

The BJP has released its first list of candidates for the Delhi Assembly elections, pitting former MP Parvesh Verma against CM Kejriwal.