മനാമ: സംഘര്‍ഷാവസ്ഥ കടുത്തിരിക്കെ സാമൂഹ്യമാധ്യമങ്ങളില്‍ ഇറാന്റെ മിസൈല്‍, ഡ്രോണ്‍ ആക്രമണങ്ങളെ അനുകൂലിച്ച് വ്യാജ വിവരങ്ങള്‍ പ്രചരിപ്പിച്ചെന്നാരോപിച്ച് എട്ട് പേരെ ബഹ്‌റൈന്‍ പൊലിസ് അറസ്റ്റ് ചെയ്തു. രാജ്യത്തിന്റെ സുരക്ഷാ നിയമങ്ങള്‍ക്ക് വിരുദ്ധമായ ഉള്ളടക്കങ്ങള്‍ പങ്കുവെച്ചതായും കൃത്രിമമായി(എ.ഐ) സൃഷ്ടിച്ച ചിത്രങ്ങള്‍ പ്രചരിപ്പിച്ചതായും ബഹ്‌റൈന്‍ ആഭ്യന്തര മന്ത്രാലയം അറിയിച്ചു.

മന്ത്രാലയത്തിന്റെ പ്രസ്താവന പ്രകാരം, അറസ്റ്റിലായവര്‍ സമൂഹമാധ്യമങ്ങള്‍ വഴി ജനങ്ങള്‍ക്കിടയില്‍ ഭീതിയും ആശയക്കുഴപ്പവും സൃഷ്ടിക്കുന്ന തരത്തിലുള്ള സന്ദേശങ്ങള്‍ പ്രചരിപ്പിച്ചു. ചില പോസ്റ്റുകളില്‍ എ.ഐ സാങ്കേതികവിദ്യ ഉപയോഗിച്ച് തയ്യാറാക്കിയ വ്യാജ ചിത്രങ്ങളും ഉള്‍പ്പെടുത്തിയിരുന്നുവെന്ന് പ്രാഥമിക അന്വേഷണത്തില്‍ കണ്ടെത്തിയതായി അധികൃതര്‍ പറഞ്ഞു. രാജ്യത്തിന്റെ സമാധാനവും സാമൂഹിക സ്ഥിരതയും തകര്‍ക്കാന്‍ ഇടയാക്കുന്ന പ്രവര്‍ത്തനങ്ങളാണിതെന്നും വ്യക്തമാക്കിയിട്ടുണ്ട്.

സുരക്ഷാ ഏജന്‍സികളുടെ നിരീക്ഷണത്തിലാണ് പ്രതികളെ തിരിച്ചറിഞ്ഞ് പിടികൂടിയത്. കേസുകള്‍ പബ്ലിക് പ്രോസിക്യൂഷനിലേക്ക് കൈമാറിയതായും കര്‍ശന നിയമ നടപടികള്‍ സ്വീകരിക്കുമെന്നും അധികൃതര്‍ അറിയിച്ചു. രാജ്യത്തിന്റെ നിയമങ്ങള്‍ ലംഘിക്കുന്ന തരത്തിലുള്ള ഉള്ളടക്കങ്ങള്‍ പങ്കുവെക്കുന്നവര്‍ക്ക് ഇളവൊന്നും ഉണ്ടാകില്ലെന്നും മുന്നറിയിപ്പ് നല്‍കി.

മേഖലയിലെ സുരക്ഷാ സാഹചര്യം അതീവ സൂക്ഷ്മമായിരിക്കെ തെറ്റായ വിവരങ്ങള്‍ പ്രചരിപ്പിക്കുന്നത് വലിയ പ്രത്യാഘാതങ്ങള്‍ക്ക് ഇടയാക്കുമെന്ന് നിരീക്ഷകര്‍ ചൂണ്ടിക്കാട്ടുന്നു. പൊതുസുരക്ഷ ഉറപ്പാക്കുന്നതിനും ആഭ്യന്തര സ്ഥിരത നിലനിര്‍ത്തുന്നതിനുമായി ശക്തമായ നടപടികള്‍ തുടരുമെന്നും അധികൃതര്‍ വ്യക്തമാക്കി.

Bahrain authorities have arrested eight individuals for allegedly supporting Iran’s missile and drone attacks and spreading fake content on social media. Officials said the action comes amid heightened regional tensions to safeguard national security and public stability.