ന്യൂഡല്‍ഹി: പ്രതിഷേധപരിപാടിക്ക് വേദിയൊരുക്കുന്നത് യു.എ.പി.എ നിയമപ്രകാരം എങ്ങനെ കുറ്റമാകുമെന്ന് ഡല്‍ഹി ഹൈക്കോടതി. ഡല്‍ഹി വംശഹത്യാ കേസില്‍ വര്‍ഷങ്ങളായി ജയിലില്‍ കഴിയുന്ന ഉമര്‍ ഖാലിദ്, ഷര്‍ജീല്‍ ഇമാം, ഗുല്‍ഫിഷ ഫാത്തിമ, ഖാലിദ് സൈഫി തുടങ്ങിയവരുടെ ജാമ്യാപേക്ഷകള്‍ പരിഗണിക്കവേയായിരുന്നു കോടതിയുടെ ചോദ്യം. ജസ്റ്റിസ് നവീന്‍ ചൗള, ജസ്റ്റിസ് ശൈലേന്ദര്‍ കൗര്‍ എന്നിവരടങ്ങിയ ഡിവിഷന്‍ ബെഞ്ച് ആണ് ഹരജി പരിഗണിച്ചത്. പൗരത്വ ഭേദഗതി നിയമത്തിനെതിരെ (സി.എ.എ) സമരം ചെയ്തതിന്റെ പേരിലാണ് ഇവരെ തടവിലാക്കുന്നത്.  ഡല്‍ഹി കലാപത്തിന് പിന്നിലെ ഗൂഢാലോചനയില്‍ പങ്കെടുത്തെന്നാണ് ആരോപണം.  

'പ്രതിഷേധത്തിന് സ്ഥലം ഒരുക്കുന്നത് യു.എ.പി.എ ചുമത്താന്‍ മതിയായ കുറ്റമാണോ? അതോ ആ പ്രതിഷേധ പരിപാടി സംഘര്‍ഷത്തിന് കാരണമായാലാണോ യു.എ.പി.എ ചുമത്തുക' ഡിവിഷന്‍ ബെഞ്ച് പൊലിസിനോട് ചോദിച്ചു. നിയമത്തിനെതിരെ പ്രതിഷേധിക്കാന്‍ ആളുകള്‍ റോഡുപരോധിക്കുന്നതിനും യുഎപിഎ ചുമത്തുമോ എന്ന് കോടതി ആരാഞ്ഞു.എന്നാല്‍ വാട്‌സാപ്പ് ഗ്രൂപ്പുകളുണ്ടാക്കി പ്രതികള്‍ കലാപത്തിനും സംഘര്‍ഷത്തിനും ആഹ്വാനം ചെയ്തതിന്റെ രേഖകളുണ്ടെന്നായി ഡല്‍ഹി പൊലിസിന്റെ വാദം. പിന്നാലെ അവ ഹാജരാക്കാന്‍ കോടതി നിര്‍ദേശിച്ചു.

 'പ്രകോപനവും ആക്രമണവും നടത്താനാണോ വാട്ട്‌സ്ആപ്പ് ഗ്രൂപ്പില്‍ ഗൂഢാലോചന നടത്തിയത് അതോ പ്രതിഷേധ പരിപാടികള്‍ സംഘടിപ്പിക്കുവാനോ? പ്രതിഷേധങ്ങള്‍ നടത്താന്‍ മാത്രമല്ല, അക്രമത്തിന് പ്രേരിപ്പിക്കാനും അവര്‍ ശ്രമിച്ചു എന്നതിന് പ്രത്യേക തെളിവുകള്‍ ഉണ്ടെങ്കില്‍ അത് ഹാജരാക്കണം' കോടതി സ്‌പെഷല്‍ പ്രോസിക്യൂട്ടറോട് ആവശ്യപ്പെട്ടു. അറസ്റ്റ് ചെയ്ത് വര്‍ഷങ്ങള്‍ പിന്നിട്ടിട്ടും വിചാരണ കോടതി ഇതുവരെ കുറ്റപത്രം സമര്‍പ്പിച്ചിട്ടില്ലാത്തതും വിചാരണയിലെ കാലതാമസവും ചൂണ്ടിക്കാട്ടിയാണ് പ്രതികള്‍ ജാമ്യാപേക്ഷ സമര്‍പ്പിച്ചത്.