കൊച്ചി: ദുബൈ ഡ്യൂട്ടി ഫ്രീയിൽ ഇന്ത്യൻ യാത്രക്കാർക്ക് യുപിഐ പേയ്മെന്റ് സൗകര്യം ലഭിക്കും. നാഷനൽ പേയ്മെന്റ് കോർപ്പറേഷൻ ഓഫ് ഇന്ത്യയുടെ (എൻപിസിഐ) രാജ്യാന്തര വിഭാഗമായ എൻപിസിഐ ഇൻ്റർനാഷനൽ പേയ്മെന്റ്സ് ലിമിറ്റഡ് (എൻഐപിഎൽ) യുഎഇയിലെ മാഗ്നാറ്റിയുമായി സഹകരണം പ്രഖ്യാപിച്ചതിനെ തുടർന്നാണ് പുതിയ മാറ്റം.

മാഗ്നാറ്റിയുടെ പോയിൻ്റ് ഓഫ് സെയിൽ (പിഒഎസ്) ടെർമിനലുകൾ വഴി യുഎഇയിലെ ക്യുആർ അധിഷ്‌ഠിത മർച്ചന്റ് പേയ്മെന്റ് നെറ്റ്‌വർക്കിലൂടെ ഇന്ത്യൻ യാത്രക്കാർക്ക് ഇനി മുതൽ പണമിടപാടുകൾ നടത്താം. ഇതുവഴി പ്രതിവർഷം ദുബൈയിലേക്കും യുഎഇയിലേക്കും യാത്ര ചെയ്യുന്ന 12 ദശലക്ഷത്തിലധികം ഇന്ത്യക്കാർക്ക് തടസ്സമില്ലാത്ത പേയ്മെന്റ് സൗകര്യങ്ങൾ നൽകാൻ എൻഐപിഎല്ലിന് കഴിയും. ആദ്യ ഘട്ടത്തിൽ ദുബൈ ഡ്യൂട്ടി ഫ്രീയിലുടനീളം ലഭിക്കുന്ന ഈ സേവനം പിന്നീട് റീട്ടെയിൽ, ഹോസ്‌പിറ്റാലിറ്റി, ഗതാഗതം, സൂപ്പർമാർക്കറ്റ് എന്നി മേഖലകളിലേക്കും വ്യാപിപ്പിക്കും.

മാഗ്നാറ്റിയുമായുള്ള പങ്കാളിത്തം യുഎഇയിൽ യുപിഐയുടെ സ്വീകാര്യത വർധിപ്പിക്കുന്നതിനുള്ള തന്ത്രപരമായ ഒരു ചുവടുവയ്പ്പാണെന്ന് എൻപിസിഐ ഇൻ്റർനാഷനൽ ചീഫ് എക്‌സിക്യൂട്ടീവ് ഓഫിസർ റിതേഷ് ശുക്ല വ്യക്തമാക്കി.

ഡിജിറ്റൽ പേയ്മെൻ്റുകൾ ശക്‌തിപ്പെടുത്താനും ഇന്ത്യൻ യാത്രക്കാർക്കും എൻആർഐകൾക്കും തടസ്സമില്ലാത്ത സേവനങ്ങൾ ഉറപ്പാക്കാനുമാണ് എൻപിസിഐ ഇൻ്റർനാഷനലുമായുള്ള സഹകരണത്തിലൂടെ ലക്ഷ്യമിടുന്നതെന്ന് മാഗ്നാറ്റി ഇൻസ്റ്റിറ്റ്യൂഷനൽ പേയ്മെന്റ് സൊല്യൂഷൻസ് മാനേജിങ് ഡയറക്‌ടർ സലിം അവാൻ വ്യക്തമാക്കി.

എൻപിസിഐ ഇൻ്റർനാഷനലും മാഗ്നാറ്റിയുമായുള്ള സഹകരണം വ്യാപാരികൾക്കും ഉപഭോക്താക്കൾക്കും അനായാസവും സുരക്ഷിതവുമായ പണമിടപാട് നടത്താൻ സഹായിക്കുമെന്ന് ദുബൈ ഡ്യൂട്ടി ഫ്രീ സിഇഒ രമേശ് സിദാംബി പറഞ്ഞു.