കുവൈത്ത് സിറ്റി: സഊദി അറേബ്യൻ അതോറിറ്റികളുടെ നിർദേശപ്രകാരം രാജ്യത്ത് നിന്ന് ഉംറ നിർവഹിക്കാൻ പോകുന്ന തീർത്ഥാടകർ മെനിഞ്ചൈറ്റിസ് വാക്സിൻ എടുക്കണമെന്ന് കുവൈത്ത് ആരോഗ്യ മന്ത്രാലയം. തീർത്ഥാടകർ യാത്രയ്ക്ക് കുറഞ്ഞത് 10 ദിവസം മുൻപു തന്നെ വാക്സീൻ എടുത്തിരിക്കണം.

മുതിർന്നവർ മാത്രമല്ല ഒരു വയസ്സ് മുതൽ പ്രായമുള്ള എല്ലാ കുട്ടികളും നിർബന്ധമായും മെനിഞ്ചൈറ്റിസ് വാക്സിൻ (എസിവൈഡബ്ള്യു-135) എടുക്കണം. ഉംറ നിർവഹിക്കാൻ പോകുന്നവർ മാത്രമല്ല സഊദിയിൽ പ്രവാചകപള്ളി സന്ദർശിക്കാൻ പോകുന്നവരും വാക്സിൻ എടുക്കണമെന്നാണ് പുതിയ നിബന്ധന.

വാക്സീൻ എടുത്ത് 10 മുതൽ 15 ദിവസത്തിനകമാണ് ശരീരത്തിൽ ബാക്‌ടീരിയയ്ക്കെതിരെ പ്രതിരോധ ശേഷി ഉണ്ടാകുന്നത് എന്നതിനാലാണ് യാത്രയ്ക്ക് 10 ദിവസം മുൻപേ തന്നെ വാക്സീൻ എടുക്കണമെന്നു നിർദേശിച്ചിരിക്കുന്നത്. വാക്സീന് പാർശ്വഫലങ്ങൾ കുറവാണ്. അതേസമയം, ചിലർക്ക് കുത്തിവയ്‌പ് എടുക്കുന്ന സമയത്ത് ചെറിയ ചുമപ്പ് അല്ലെങ്കിൽ നേരിയ വേദന ഉണ്ടാകാം.

തീർത്ഥാടകർ തിരക്കേറിയ സ്‌ഥലങ്ങളിൽ മാസ്ക്‌ ധരിക്കുന്നത് നല്ലതാണെന്നും മന്ത്രാലയം ഓർമ്മപ്പെടുത്തി. വാക്‌സിനേഷൻ സർട്ടിഫിക്കറ്റിന് മൂന്ന് വർഷത്തെ കാലാവധിയുണ്ട്. രാജ്യത്തെ എല്ലാ ഹെൽത്ത് സെൻ്ററുകളിലും യാത്രാ ക്ലിനിക്കുകളിലും വാക്‌സീൻ ലഭിക്കും.

The Kuwait Ministry of Health has announced that it will make the meningitis vaccine mandatory for Umrah pilgrims, following a recommendation from Saudi Arabian authorities.