അമൃത്സര്‍: ആപ്പില്‍ ചേരുമെന്ന് കരുതിയിരുന്ന മുന്‍ രാജ്യസഭ എം.പിയും ക്രിക്കറ്റ് താരവുമായ നവജ്യോദ് സിങ് സിദ്ദു പുതിയ പാര്‍ട്ടിയുണ്ടാക്കുന്നു. അടുത്ത വര്‍ഷം പഞ്ചാബില്‍ നടക്കുന്ന നിയമസഭാ തെരഞ്ഞെടുപ്പു മുന്നില്‍ കണ്ടാണ് സിദ്ദുവിന്റെ നീക്കം. ആവാസ് എ പഞ്ചാബ് എന്നാണ് പുതിയ രാഷ്ട്രീയ പാര്‍ട്ടിയുടെ പേര്.
പ്രഖ്യാപനം ഈ മാസം ഒന്‍പതിന് ഉണ്ടാകുമെന്നാണ് റിപ്പോര്‍ട്ട്. മുന്‍ ഇന്ത്യന്‍ ഹോക്കി താരവും ശിരോമണി അകാലിദള്‍ നേതാവുമായിരുന്ന പര്‍ഗത് സിങ്, സ്വതന്ത്ര എം.എല്‍.എമാരായ സിമര്‍ജിത് സിങ് ബെയിന്‍സും ബല്‍വീന്ദര്‍ സിങ് ബെയിന്‍സും പാര്‍ട്ടി രൂപീകരണത്തില്‍ സിദ്ദുവിനൊപ്പമുണ്ട്. ബി.ജെ.പി വിട്ട ശേഷം ഏതു പാര്‍ട്ടിയില്‍ ചേരണമെന്ന അനിശ്ചിതത്വത്തിലായിരുന്നു സിദ്ദു. ആം ആദ്മിയില്‍ ചേരുമെന്നായിരുന്നു പ്രചരിച്ചിരുന്ന വാര്‍ത്തകള്‍. തന്നെ മുഖ്യമന്ത്രി സ്ഥാനാര്‍ഥിയാക്കണമെന്ന ആവശ്യത്തില്‍ ആം ആദ്മി പാര്‍ട്ടിയുമായി നടത്തിയ ചര്‍ച്ചകള്‍ വഴിമുട്ടിയതോടെയാണ് പുതിയ പാര്‍ട്ടി രൂപീകരണത്തിലെത്തിയത്.