ചെന്നൈ: ഇന്ത്യൻ സൂപ്പർ ലീഗിൽ കഴിഞ്ഞദിവസം നടന്ന മത്സരത്തിൽ ചെന്നൈയിൻ എഫ്‌സിയെ 3-1ന് പരാജയപ്പെടുത്തി കേരള ബ്ലാസ്റ്റേഴ്‌സ് തകർപ്പൻ വിജയം സ്വന്തമാക്കിയിരുന്നു. മത്സരത്തിൽ ബ്ലാസ്റ്റേഴ്സിനൊപ്പം ഒരു ചരിത്രനേട്ടമാണ് യുവതാരം കൊറോ സിങ് സ്വന്തമാക്കിയത്. മത്സരത്തിന്റെ ആദ്യ പകുതിയിലെ ഇഞ്ചുറി ടൈമിൽ ആയിരുന്നു താരം ഗോൾ നേടിയത്. 

ഇതോടെ ഇന്ത്യൻ സൂപ്പർ ലീഗിൽ ഗോൾ നേടുന്ന ഏറ്റവും പ്രായം കുറഞ്ഞ രണ്ടാമത്തെ താരമായാണ് കൊറോ സിങ് മാറിയത്. 18 വയസും 58 ദിവസവും പ്രായമുള്ളപ്പോൾ ആണ് കൊറോ ഈ നേട്ടം സ്വന്തമാക്കിയത്. ഈ നേട്ടത്തിൽ രണ്ടാം സ്ഥാനത്തുള്ളത് കോമൽ തട്ടാലാണ്.  2018ൽ  ബെംഗളൂരു എഫ്‌സിക്കെതിരെ ഗോൾ നേടിയാണ് താരം ഈ നേട്ടം സ്വന്തമാക്കിയത്. 18 വയസും 43 ദിവസവും പ്രായമുള്ളപ്പോൾ ആണ് കോമൽ ഈ നേട്ടം സ്വന്തമാക്കിയത്. 

അതേസമയം മത്സരത്തിൽ ബ്ലാസ്‌റ്റേഴ്‌സിനായി കോറോക്ക് പുറമെ ജീസസ് ജിമിനസും ക്വാമി പെപ്രയുമാണ് മറ്റ് രണ്ട് ഗോളുകൾ നേടിയത്. ചെന്നൈയിന്റെ ആശ്വാസ ​ഗോൾ നേടിയത് വിൻസി ബെരറ്റോയാണ്. മത്സരത്തിന്റെ 37-ാം മിനിറ്റിൽ മിലോസ് ഡ്രിൻസിച്ചിനെ ഫൗൾ ചെയ്തതിന് ചെന്നൈ താരം വിൽമർ ജോർദാന് റെഡ് കാർഡ് കണ്ട് പുറത്തുപോയിരുന്നു. ഇതോടെ ചെന്നൈയിൻ എഫ്‌സി പത്തു പേരായാണ് മത്സരം പൂർത്തിയാക്കിയത്.

ഈ തകർപ്പൻ വിജയത്തോടെപോയിന്റ് ടേബിളിൽ 8-ാം സ്ഥാനത്താണ് കേരള ബ്ലാസ്റ്റേഴ്‌സ്. 19മത്സരങ്ങൾ പിന്നിട്ടപ്പോൾ ഏഴ് ജയവും മൂന്ന് സമനിലയും ഒമ്പത് തോൽവിയുമായി 24 പോയിന്റാണ് ബ്ലാസ്റ്റേഴ്സിന്റെ കൈവശമുള്ളത്.