ദുബൈ: റമദാന്‍ മാസമായതോടെ യുഎഇയില്‍ ഉംറ അന്വേഷണങ്ങളിലും ബുക്കിംഗുകളിലും വന്‍ വര്‍ധനവാണ് കാണിക്കുന്നത്. കഴിഞ്ഞ വര്‍ഷത്തെ ശൈത്യകാല മാസങ്ങളെ അപേക്ഷിച്ച് വിമാന ടിക്കറ്റ് നിരക്കില്‍ ഏകദേശം 140 ശതമാനം വര്‍ധനവാണ് ഇപ്രാവശ്യം ഉണ്ടായിരിക്കുന്നത്.

പുണ്യനഗരമായ മക്കയില്‍ റമദാന്‍ ആരംഭിക്കാനും അവസാനിപ്പിക്കാനും നിരവധി താമസക്കാര്‍ ആകാംക്ഷയോടെ കാത്തിരിക്കുന്നതിനാല്‍ വിമാന ടിക്കറ്റിന് വന്‍ ഡിമാന്‍ഡാണ് നിലനില്‍ക്കുന്നതെന്ന് ഒരു ഉംറ ഓപ്പറേറ്റര്‍ പറഞ്ഞു.

പുണ്യമാസം ആരംഭിക്കുന്നതിന് മുമ്പ് ജിദ്ദയില്‍ എത്തിച്ചേരാനും ഗ്രാന്‍ഡ് മോസ്‌കില്‍ ആദ്യത്തെ തറാവീഹ് നമസ്‌കരിക്കാനും വിശ്വാസികളില്‍ പലരും ഇഷ്ടപ്പെടുന്നു. മറ്റു ചിലര്‍ റമദാനിലെ അവസാന ദിവസങ്ങള്‍ പുണ്യനഗരമായ മക്കയില്‍ ചെലവഴിക്കാനും അവിടെ ഈദ് ആഘോഷിക്കാനുമാണ് ആഗ്രഹിക്കുന്നത്. 

'ഫെബ്രുവരിയിലും മാര്‍ച്ച് ആദ്യത്തിലും റമദാന്‍ ആരംഭിക്കുന്നതിനോടൊപ്പം യാത്രയ്ക്കായി ധാരാളം കോളുകള്‍ ഞങ്ങള്‍ക്ക് ലഭിക്കുന്നുണ്ട്. ജനുവരിയില്‍ ആയിരക്കണക്കിന് യുഎഇ നിവാസികള്‍ ഉംറ നിര്‍വഹിച്ചെങ്കിലും, റമദാന്‍ അടുക്കുമ്പോള്‍ ഫെബ്രുവരിയില്‍ തീര്‍ത്ഥാടകരുടെ എണ്ണം ഗണ്യമായി ഉയരുമെന്നാണ് പ്രതീക്ഷിക്കുന്നത്,' ഉംറ ഓപ്പറേറ്ററായ പെര്‍വാദ് പറഞ്ഞു.

2024 ഒക്ടോബര്‍ മുതല്‍ ഡിസംബര്‍ വരെയുള്ള കാലയളവില്‍ ഒരു റൗണ്ട് ട്രിപ്പിനുള്ള വിമാന ടിക്കറ്റു നിരക്ക് ശരാശരി 580 ദിര്‍ഹം ആയിരുന്നു. നിലവില്‍ ദുബൈയില്‍ നിന്ന് ജിദ്ദയിലേക്കുള്ള വണ്‍വേ ടിക്കറ്റുകള്‍ക്ക് 980 ദിര്‍ഹമാണ് നിരക്ക്, ശരാശരി റൗണ്ട് ട്രിപ്പ് നിരക്ക് 1,400 ദിര്‍ഹവും. റമദാനിന്റെ ആദ്യ ദിവസങ്ങളില്‍, നിരക്കുകള്‍ 1,200 ദിര്‍ഹമാകുമെന്നാണ് കണക്കുകൂട്ടുന്നത്. പുണ്യമാസത്തിന്റെ അവസാനത്തോടെ ഇത് 1,600 ദിര്‍ഹത്തോട് അടുത്തേക്കും. അബൂദബിയില്‍ നിന്ന് വിമാന ടിക്കറ്റ് നിരക്കുകള്‍ 1,700 ദിര്‍ഹം മുതലാണ് ആരംഭിക്കുന്നത്.

അതേസമയം യുഎഇയില്‍ നിന്നുള്ള ഉംറ ബസ് യാത്രകളുടെ വിലകള്‍ മാറ്റമില്ലാതെ തുടരുകയാണ്. താമസവും വിസയും ഉള്‍പ്പെടെ 10 ദിവസത്തെ യാത്രയ്ക്ക് 1,200 ദിര്‍ഹം മുതലാണ് ആരംഭിക്കുന്നത്. വര്‍ധിച്ചുവരുന്ന ചെലവുകള്‍ക്കിടയിലും, പലരും സാമ്പത്തിക ആശങ്കകളേക്കാള്‍ ആത്മീയ യാത്രയ്ക്കാണ് മുന്‍ഗണന നല്‍കുന്നത്.