തിരുവനന്തപുരം: പാതിവില തട്ടിപ്പുമായി ബന്ധപ്പെട്ട കേസുകള്‍ ക്രൈംബ്രാഞ്ചിന് കൈമാറി ഡി.ജി.പി ഉത്തരവിറക്കി. കോട്ടയം, ആലപ്പുഴ, ഇടുക്കി, എറണാകുളം റൂറല്‍, കണ്ണൂര്‍ എന്നിവിടങ്ങളില്‍ രജിസ്റ്റര്‍ ചെയ്ത 34 കേസുകളാണ് ആദ്യഘട്ടമായി ക്രൈംബ്രാഞ്ചിന് കൈമാറിയത്.

ക്രൈംബ്രാഞ്ചിന്റെ സാമ്പത്തിക കുറ്റാന്വേഷണ വിഭാഗത്തെ കൂടാതെ അന്വേഷണത്തിനായി എല്ലാ ജില്ലകളിലും പ്രത്യേക സംഘം രൂപീകരിക്കും. ക്രൈംബ്രാഞ്ച് മേധാവി നേരിട്ട് അന്വേഷണത്തിന് മേല്‍നോട്ടം വഹിക്കും. എല്ലാ ജില്ലകളിലും രജിസ്റ്റര്‍ ചെയ്യുന്ന കേസുകള്‍ ക്രൈംബ്രാഞ്ചിന് കൈമാറാനും ഡി.ജി.പി നിര്‍ദേശിച്ചിട്ടുണ്ട്. 

അനന്തുകൃഷ്ണന്റെ ബാങ്ക് അക്കൗണ്ടുകള്‍ പരിശോധിച്ചതില്‍ 33000 പേരില്‍ നിന്ന് പണം വാങ്ങിയതായി ഇതുവരെ കണ്ടെത്തിയത്. ഇതുകൂടാതെ സംസ്ഥാനത്തെ വിവിധ പൊലിസ് സ്റ്റേഷനുകളില്‍ നിരവധി പരാതികളാണ് ലഭിക്കുന്നത്. ലഭിച്ച പരാതികളുടെ അടിസ്ഥാനത്തില്‍ മാത്രം 800 കോടിയിലധികം രൂപയുടെ തട്ടിപ്പ് നടന്നതായാണ് പ്രാഥമിക വിലയിരുത്തല്‍. 

അതേസമയം, മൂവാറ്റുപുഴ പൊലിസിന്റെ കസ്റ്റഡിയിലാണ് അനന്തുകൃഷ്ണയുള്ളത്.  നിലവില്‍ രജിസ്റ്റര്‍ ചെയ്ത കേസുകളില്‍ പരാതിക്കാരില്‍ നിന്ന് മൊഴിയെടുക്കലും ലഭിക്കുന്ന തെളിവുകള്‍ ശേഖരിക്കലും മാത്രമാണ് നടക്കുന്നത്. കോഴിക്കോട് നടക്കാവ് പൊലിസ് രജിസ്റ്റര്‍ ചെയ്ത ഒരു കേസില്‍ മാത്രം 2,16,45,745 രൂപ തട്ടിപ്പ് നടന്നിട്ടുണ്ട്. 

അനന്തുകൃഷ്ണന് രാഷ്ട്രീയ പാര്‍ട്ടികളുമായി അടുത്ത ബന്ധമാണുള്ളത്. അതിനാല്‍ അന്വേഷണം വൈകുന്നതില്‍ പ്രതിപക്ഷ രാഷ്ട്രീയ പാര്‍ട്ടികളുള്‍പ്പെടെയുള്ളവയുടെ നേതൃത്വത്തിലുള്ള പ്രതിഷേധങ്ങളും കുറവാണ്.