ന്യൂഡൽഹി: ആഗോള എ.ഐ ഉച്ചകോടിക്കിടെ യൂത്ത് കോൺഗ്രസ് പ്രവർത്തകർ നടത്തിയ ഷർട്ടൂരിയുള്ള പ്രതിഷേധത്തിന്റെ പേരിൽ അറസ്റ്റിലായ യൂത്ത് ദേശീയ കോൺ​ഗ്രസ് ദേശീയ അധ്യക്ഷൻ ഉദയ് ഭാനു ചിബിന് ജാമ്യം. ഉദയ് ബാനു ചിബിനെ നാല് ദിവസം മുൻപാണ് ഡൽഹി പൊലിസ് അറസ്റ്റ് ചെയ്തത്. 20 മണിക്കൂറോളം നീണ്ട ചോദ്യം ചെയ്യലിന് ശേഷമാണ് യൂത്ത് കോൺഗ്രസ് നേതാവിനെ അറസ്റ്റ് ചെയ്തത്. ഗൂഢാലോചന ആരോപിച്ച ഡൽഹി പൊലിസ് ക്രിമിനൽ ഗൂഢാലോചന, ഒരു പൊതുപ്രവർത്തകനെ സ്വമേധയാ ഉപദ്രവിക്കൽ, ജോലി തടസ്സപ്പെടുത്തൽ, കലാപകുറ്റം എന്നീ കുറ്റങ്ങൾ ചുമത്തിയാണ് കേസെടുത്തിരുന്നത്.

എഐ ഇംപാക്ട് ഉച്ചകോടിയിലെ ഒരു പ്രദർശന ഹാളിൽ കഴിഞ്ഞ ആഴ്ചയിലെ വെള്ളിയാഴ്ചയായിരുന്നു യൂത്ത് കോൺഗ്രസ് പ്രവർത്തകരുടെ പ്രതിഷേധം ഉണ്ടായത്. അമേരിക്കയ്ക്ക് മാത്രം ഗുണകരമാകുന്ന തരത്തിൽ ഇന്ത്യ നടപ്പാക്കുന്ന വ്യാപാര കരാറുകൾക്കെതിരെയാണ് പ്രതിഷേധം ഉണ്ടായത്. ഈ കരാറുകൾ കർഷകരെയും പൊതുജനങ്ങളെയും വഞ്ചിക്കുന്നതാണെന്ന് തുറന്നുകാട്ടുകയായിരുന്നു യൂത്ത് കോൺഗ്രസ് പ്രവർത്തകരുടെ ലക്ഷ്യം. ഇന്ത്യ-യുഎസ് വ്യാപാര കരാറിനെതിരെയുമുള്ള മുദ്രാവാക്യങ്ങൾ എഴുതിയ ടീ-ഷർട്ടുകൾ കയ്യിലേന്തിയായിരുന്നു യൂത്ത് കോൺഗ്രസ് പ്രവർത്തകർ പ്രതിഷേധിച്ചത്. 

ALSO READ: ഇനി അവസാനിക്കുമോ കെജ്‌രിവാളിന്റെ രാഷ്ട്രീയ വനവാസം?

പ്രതിഷേധത്തെ കായികമായി നേരിട്ട പൊലിസ് സംഭവം ദിവസം തന്നെ നാലുപേരെ അറസ്റ്റ് ചെയ്തിരുന്നു. ആകെ എട്ട് പേരെയാണ് സംഭവത്തിൽ അറസ്റ്റ് ചെയ്തത്. ഷിംലയിലേക്ക് മാറിയ പ്രവർത്തകരെ ഹിമാചൽ പൊലിസിനെ വിവരം അറിയിക്കാതെ ട്രാൻസിറ്റ് റിമാൻഡും ഇല്ലാതെ അറസ്റ്റ് ചെയ്യാൻ എത്തിയ ഡൽഹി പൊലിസ് നാണംകെട്ട സംഭവവും ഇതിനിടെ ഉണ്ടായി. ട്രാൻസിറ്റ് റിമാൻഡ് ഇല്ലാതെ പ്രതികളെ ഡൽഹിയിലേക്ക് കൊണ്ടുപോകാൻ ശ്രമിച്ച ഡൽഹി പൊലിസിനെ ഷിംല പൊലിസ് വഴിയിൽ തടഞ്ഞു. പിന്നാലെ കയർത്തു സംസാരിച്ച് പ്രോകോപനമുണ്ടാക്കിയ ഡൽഹി പൊലിസിനെ ഷിംല പൊലിസ് അറസ്റ്റ് ചെയ്ത് കേസെടുക്കുകയും ചെയ്തു. ഒടുവിൽ മണിക്കൂറുകൾ കസ്റ്റഡിയിൽ കഴിഞ്ഞതിന് ശേഷമാണ് കോടതി ഇടപെടലിൽ ഡൽഹി പൊലിസിനെ മോചിപ്പിച്ചത്.

ALSO READ: യൂത്ത് കോൺഗ്രസ് പ്രവർത്തകരെ കസ്റ്റഡിയിലെടുത്തു, ഡൽഹി പൊലിസും ഹിമാചൽ പൊലിസും തമ്മിൽ നടുറോഡിൽ തർക്കം; ഡൽഹി പൊലിസിനെതിരെ കേസ്

അതേസമയം, പ്രതിഷേധത്തിനെതിരെ രമഗത്ത് വന്ന പ്രധാനമന്ത്രി നരേന്ദ്രമോദിയെ രൂക്ഷഭാഷയിൽ വിമർശിച്ച് പ്രതിപക്ഷ നേതാവ് രാഹുൽ ഗാന്ധി രംഗത്ത് വന്നു. പ്രതിഷേധിക്കുന്നവരെ അറസ്റ്റ് ചെയ്യുന്നത് സർക്കാരിന്റെ സ്വേച്ഛാധിപത്യ മനോഭാവത്തിന്റെയും ഭീരുത്വത്തിന്റെയും തെളിവാണ് എന്ന് അദ്ദേഹം പറഞ്ഞു. അറസ്റ്റ് പ്രധാനമന്ത്രിയുടെ ഭീരുത്വത്തിന്റെ തെളിവാണെന്ന് പറഞ്ഞ രാഹുൽ ഗാന്ധി, പ്രതിഷേധിച്ച യൂത്ത് കോൺഗ്രസ് പ്രവർത്തകരെയോർത്ത് അഭിമാനമുണ്ടെന്നും വ്യക്തമാക്കി.