ചങ്ങരംകുളം: സംസ്ഥാനപാതയിലെ അപകടമേഖലയായ ചിയ്യാനൂര്‍ പാടത്ത് പെട്രോള്‍ പമ്പിലേക്കു ലോറി പാഞ്ഞു കയറി വന്‍ദുരന്തം ഒഴിവായി. കോഴിക്കോട്-തൃശൂര്‍ സംസ്ഥാന പാതയില്‍ സ്ഥിരം അപകട മേഖലയായ ചിയ്യാനൂര്‍പാടത്തെ സെമി ഹമ്പിനു സമീപത്തു കഴിഞ്ഞ ദിവസം പുലര്‍ച്ചെ നാലോടെയാണു സംഭവം. കോഴിക്കോടു നിന്ന് അതിരപ്പള്ളിയിലേക്കു വെളളമെടുക്കാന്‍ പോകുകയായിരുന്ന ലോറിയാണ് അപകടത്തില്‍പ്പെട്ടത്.
നിയന്ത്രണം വിട്ടു ഡിവൈഡറിലും പമ്പിലേക്കു കയറുന്ന ഭിത്തിയിലും ഇടിച്ചു നില്‍ക്കുകയായിരുന്നു. ജീവനക്കാര്‍ നിസാര പരുക്കുകളോടെ രക്ഷപ്പെട്ടു. ചങ്ങരംകുളം പൊലിസ് സ്ഥലത്തെത്തി മേല്‍ നടപടികള്‍ സ്വീകരിച്ചു. കഴിഞ്ഞ മാസം ഇതേ സ്ഥലത്ത് പമ്പിലെ ജീവനക്കാരനായ വിദ്യാര്‍ഥി സ്വകാര്യ ബസ് പാഞ്ഞുകയറി മരിച്ചിരുന്നു.