ദുബൈ: നഗരത്തിലെ ഏറ്റവും ജനസാന്ദ്രതയുള്ള പ്രദേശങ്ങളെ ബന്ധിപ്പിക്കുന്നതിനായി രൂപകൽപ്പന ചെയ്തിട്ടുള്ള ഭൂഗർഭ ഗതാഗത സംവിധാനമായ 'ദുബൈ ലൂപ്പ്' വികസിപ്പിക്കുന്നതിനായി ഇലോൺ മസ്‌കിന്റെ ബോറിംഗ് കമ്പനിയുമായി സഹകരിച്ച് പ്രവർത്തിക്കുമെന്ന് പ്രഖ്യാപിച്ച് ദുബൈ.

വേൾഡ് ഗവൺമെന്റ് ഉച്ചകോടിയിൽ ഇലോൺ മസ്‌കിനൊപ്പം നടന്ന പ്ലീനറി സെഷനിൽ യുഎഇയിലെ ആർട്ടിഫിഷ്യൽ ഇന്റലിജൻസ്, ഡിജിറ്റൽ ഇക്കണോമി, റിമോട്ട് വർക്ക് ആപ്ലിക്കേഷനുകൾ എന്നിവയുടെ സഹമന്ത്രിയും വേൾഡ് ഗവൺമെന്റ്സ് ഉച്ചകോടിയുടെ വൈസ് ചെയർമാനുമായ ഒമർ സുൽത്താൻ അൽ ഒലാമയാണ് ഇക്കാര്യം വ്യക്തമാക്കിയത്.

"ഇന്ന് ഞങ്ങൾ ദുബൈ ലൂപ്പിന്റെ സംയുക്ത പദ്ധതി പ്രഖ്യാപിക്കുന്നു, ഇത് ദുബൈയിലെ ഏറ്റവും ജനസാന്ദ്രതയുള്ള പ്രദേശങ്ങൾ ഉൾക്കൊള്ളുന്ന ഒരു ലൂപ്പ് പദ്ധതിയാണ്. ഇതിലൂടെ ജനങ്ങൾക്ക് ഒരു പോയിന്റിൽ നിന്ന് മറ്റൊന്നിലേക്ക് സുഗമമായി സഞ്ചരിക്കാൻ സാധിക്കും. ഇതുവഴി ആളുകളുടെ ജീവിതത്തിൽ മാറ്റം വരുത്താൻ കഴിയുമെന്ന് പ്രതീക്ഷിക്കുന്നതായും" അദ്ദേഹം പറഞ്ഞു.  

ബോറിങ്ങ് കമ്പനി

2016-ൽ ഇലോൺ മസ്‌ക് സ്ഥാപിച്ച ഇൻഫ്രാസ്ട്രക്ചർ, ടണൽ നിർമ്മാണ സേവന കമ്പനിയാണ് ബോറിംഗ് കമ്പനി. ഭൂഗർഭ ഗതാഗത സംവിധാനങ്ങൾ വികസിപ്പിച്ച് നഗര ഗതാഗതക്കുരുക്ക് പരിഹരിക്കുന്നതിനാണ് കമ്പനി ആരംഭിച്ചത്. വാഹനങ്ങൾ, ചരക്ക് ഗതാഗതം, അതിവേഗ ഗതാഗതം എന്നിവയ്ക്കായി ഉപയോഗിക്കാവുന്ന ചെലവ് കുറഞ്ഞതും വേഗത്തിൽ കുഴിക്കാവുന്നതുമായ ടണലുകളുടെ നിർമാണത്തിൽ കമ്പനി ശ്രദ്ധ കേന്ദ്രീകരിക്കുന്നു.

അതേസമയം, ബോറിംഗ് കമ്പനിയുടെ ലൂപ്പ് പ്രോജക്റ്റിന്റെ ലാസ് വെഗാസ് മാതൃക ദുബൈ ലൂപ്പ് കൃത്യമായി പിന്തുടരുമോ എന്ന് വ്യക്തമല്ല. ലാസ് വെഗാസ് കൺവെൻഷൻ സെൻ്റർ ലൂപ്പ് (എൽവിസിസി ലൂപ്പ്) ലാസ് വെഗാസ് കൺവെൻഷൻ സെൻ്ററിൽ സേവനം നൽകുന്ന ഒരു ഭൂഗർഭ ഗതാഗത സംവിധാനമാണ്. വെഗാസ് ലൂപ്പ് രൂപകൽപ്പന ചെയ്തിരിക്കുന്നത് ടെസ്‌ല മോഡൽ 3 കാറുകളിൽ ഉയർന്ന വേഗതയിൽ യാത്രക്കാരെ കൊണ്ടു പോകുന്ന രീതിയിലാണ്.

Elon Musk's company has announced its collaboration on the 'Dubai Loop' project, a futuristic infrastructure initiative