മലയാളികളുടെ പ്രിയപ്പെ വിഭവമാണ് മുട്ട. പക്ഷേ അമിതമായാല്‍ ആരോഗ്യത്തിന് ഹാനികരമാവുകയും ചെയ്യും.  ഒരു ദിവസം ഒരു മുട്ടയെങ്കിലും കഴിക്കുന്ന ആളുകളാണ് കൂടുതല്‍ പേരും. പുഴുങ്ങിയും പൊരിച്ചും പലഹാരമാക്കിയും കറിവച്ചുമൊക്കെ നമ്മള്‍ മുട്ട കഴിക്കും. എന്നാല്‍ ഒരാള്‍ക്ക് ഒരു ദിവസം എത്ര മുട്ട വരെ കഴിക്കാനാവും. 30 മുട്ടയൊക്കെ ഒരു ദിവസം കഴിക്കാന്‍ പറ്റുമോ? എന്നാല്‍, 30 മുട്ട ഒരു ദിവസം വച്ച് കഴിച്ചാല്‍ എങ്ങനെ ഉണ്ടാവും.

അങ്ങനെ ആയിരം മുട്ട ഒരു മാസം കഴിച്ചാല്‍ ശരീരത്തിന് എന്താണ് സംഭവിക്കുക ?  നോക്കാം. ഇങ്ങനെ മുട്ട കഴിച്ച് പരീക്ഷിച്ചു നോക്കിയ ഒരാള്‍ പറയുന്നത് കേള്‍ക്കാം. ഇദ്ദേഹം ഒരു ബോഡി ബില്‍ഡര്‍ ആണ്. ജോസഫ് എവറെറ്റ് എന്നാണ് ഇയാളുടെ പേര്. ജാപ്പനീസ് സ്വദേശിയാണ് ഇദ്ദേഹം. താമസം ടോക്കിയോയിലും. മാത്രമല്ല യൂട്യൂബര്‍ കൂടിയാണ് ജോസഫ്. ഇദ്ദേഹം തന്റെ പരീക്ഷണങ്ങളെല്ലാം വിഡിയോ ആയി ഇടാറുണ്ട്. ചാനലിലൂടെയാണ് അദ്ദേഹം പങ്കുവയ്ക്കുന്നത്. മുട്ടയുടെ വെള്ളനിറത്തിലുള്ള ഓംലറ്റുകള്‍, സ്മൂത്തികള്‍, പച്ചമുട്ടയും ചോറും ചേര്‍ത്ത അത്താഴം എന്നിങ്ങനെയായിരുന്നു അദ്ദേഹത്തിന്റെ ഭക്ഷണക്രമം. 

 എന്നാല്‍ ഈ പരീക്ഷണം തുടങ്ങുന്നതിനു മുമ്പ് അയാള്‍ ഫിറ്റ്‌നസ് അളന്നിരുന്നു. ഭാരം കണക്കാക്കുകയും രക്തം പരിശോധിച്ച് ശരീരത്തിലെ പോഷകങ്ങളുടെ അളവ് എഴുതിവയ്ക്കുകയും ചെയ്തു. കൊളസ്‌ട്രോള്‍, ടെസ്‌റ്റോസ്റ്റിറോണ്‍ എന്നിവയുടെ നിരക്കും ഇയാള്‍ എഴുതിവച്ചു. ഒരു മാസത്തെ പരീക്ഷണത്തിനു ശേഷം ഈ ടെസ്റ്റുകളെല്ലാം ഇദ്ദേഹം വീണ്ടും നടത്തി. എന്നാല്‍ ശരീരത്തിലെ പേശികളുടെ ബലം ആറുകിലോയോളം വര്‍ധിച്ചിരുന്നു.

മോശം കൊഴുപ്പാണെങ്കില്‍ ഒട്ടുമില്ലെന്നു മാത്രമല്ല നല്ല കൊളസ്‌ട്രോള്‍ വര്‍ധിക്കുകയും ചെയ്തു. രക്തത്തിലെ അപകടകാരിയായ കൊഴുപ്പായ ട്രൈഗ്ലിസറൈഡ് വന്‍തോതില്‍ കുറഞ്ഞതായും കണ്ടെത്തി. ഇത് ഹൃദ്രോഗത്തിന് കാരണമാക്കുന്ന കൊഴുപ്പാണ്. 30 മുട്ട കഴിച്ചിരുന്ന ജോസഫ് കൃത്യമായി വ്യായാമം ചെയ്യുകയും അതിലൂടെ കൊഴുപ്പ് അടിയുന്നത് തടയുകയും ചെയ്തിരുന്നു.

അതുകൊണ്ട്  തന്നെ ഇത്രയധികം മുട്ടകഴിക്കുന്നത് സ്റ്റിറോയിഡുകളുടെ ഫലം ചെയ്‌തെന്നാണ് ജോസഫ് പറയുന്നത്. എന്നാല്‍ ഇത് തീര്‍ത്തും ഇയാളുടെ വ്യക്തിപരമായ അനുഭവമാണെന്നും ജോസഫിനെ അനുകരിച്ച് മറ്റുള്ളവര്‍ ഇങ്ങനെ ചെയ്യരുതെന്നും ആരോഗ്യവിദഗ്ധര്‍ മുന്നറിയിപ്പ് നല്‍കിയിട്ടുണ്ട്.