റിയാദ്: ശീതക്കാറ്റുകള്‍ ശക്തമായതിനെ തുടര്‍ന്ന് സഊദി തണുത്തുവിറയ്ക്കുകയാണ്. സഊദിയുടെ പല ഭാഗങ്ങളിലും വീശിയടിച്ച ശീതക്കാറ്റ് കാരണമായി പലയിടത്തും മഞ്ഞുവീണിരുന്നു. രാജ്യത്തിന്റെ വടക്കുകിഴക്കന്‍ ഭാഗത്തുള്ള ഗവര്‍ണറേറ്റായ റഫയിലെ ഒരു ജലധാര മഞ്ഞുപുതച്ച ചിത്രങ്ങള്‍ ഇപ്പോള്‍ സമൂഹമാധ്യമങ്ങളിലൂടെ പ്രചരിക്കുകയാണ്. ചൊവ്വാഴ്ച രാവിലെ എടുത്ത ഫോട്ടോകളില്‍ ജലധാര മഞ്ഞു മൂടിയ നിലയിലാണ് കാണപ്പെടുന്നത്. 

 

 

ഫോട്ടോ എടുക്കുന്ന സമയത്ത് തണുപ്പ് അതിന്റെ ഉച്ചസ്ഥായിയിലെത്തിയിരുന്നു എന്നാണ് ഫോട്ടോ എടുത്ത വ്യക്തി പറയുന്നത്. റഫയില്‍ താപനില 2 ഡിഗ്രി സെല്‍ഷ്‌സില്‍ എത്തിയപ്പോള്‍ തന്നെ തുറസ്സായ ഇടങ്ങളിലും പുല്‍നാമ്പുകള്‍ക്കു മുകളിലും മഞ്ഞു വീണു തുടങ്ങിയിരുന്നു.

ശനിയാഴ്ച മുതല്‍ വടക്കന്‍, മധ്യ, വടക്കുകിഴക്കന്‍ പ്രദേശങ്ങളില്‍ അതിശൈത്യം അനുഭവപ്പെടുമെന്ന് സഊദി നാഷണല്‍ സെന്റര്‍ ഫോര്‍ മെറ്റീരിയോളജി നേരത്തെ പ്രവചിച്ചിരുന്നു. ചൊവ്വാഴ്ച, വടക്കന്‍ അതിര്‍ത്തി മേഖലയില്‍ സ്ഥിതി ചെയ്യുന്ന തുറൈഫില്‍ താപനില 4 ഡിഗ്രി സെല്‍ഷ്യസ് ആയി കുറഞ്ഞിരുന്നു. ഇവിടെ ജലത്തിന്റെ ഉപരിതലം തണുത്തുറഞ്ഞതായും കുളങ്ങളിലും നദീതടങ്ങളിലും മഞ്ഞുപാളികള്‍ രൂപപ്പെട്ടതായും സഊദി പ്രസ് ഏജന്‍സി (SPA) റിപ്പോര്‍ട്ടു ചെയ്തു.

 

 

കഠിനമായ ശൈത്യകാലത്തിന് പേരുകേട്ട തുറൈഫില്‍ യൂറോപ്പില്‍ നിന്ന് തെക്കോട്ട് പ്രവഹിക്കുന്ന ധ്രുവ വായു പിണ്ഡം കാരണമാണ് ഇടയ്ക്കിടെ മഞ്ഞുവീഴ്ച ഉണ്ടാകുന്നത്. നിലവിലെ തണുപ്പ് ഈ സീസണിലെ ഏറ്റവും ശക്തമാണെന്നും വ്യാഴാഴ്ച വരെ ഇതു തുടരുമെന്നും എന്‍സിഎം വക്താവ് ഹുസൈന്‍ അല്‍ ഖഹ്താനി പറഞ്ഞു. 'കാലാവസ്ഥാ റിപ്പോര്‍ട്ടുകള്‍ പ്രകാരം വെള്ളിയാഴ്ച ശൈത്യകാലത്തിന്റെ അവസാന ദിവസമാണ്,' അദ്ദേഹം ഒരു സ്വകാര്യ ടെലിവിഷന്‍ ചാനലിനോട് പറഞ്ഞു.