ന്യൂഡൽഹി: സിബിഎസ്ഇ സ്കൂളുകളുടെ അഫിലിയേഷൻ നിബന്ധനകളിൽ മാറ്റം. ഒരു സ്കൂൾ അതിന്റെ പേരും അഫിലിയേഷൻ നമ്പറും ഉപയോഗിച്ച് ശാഖകൾ ആരംഭിക്കാനുള്ള അനുമതിയാണ് പുതിയ തീരുമാനം. എന്നാൽ ഇത്തരത്തിൽ ആരംഭിക്കുന്ന സ്കൂളുകൾക്ക് വിദ്യാഭ്യാസ അടിസ്ഥാന സൗകര്യങ്ങൾ സുരക്ഷിതമായി ഒരുക്കണമെന്ന് നിബന്ധനയുണ്ട്.

കുട്ടികൾക്ക് പ്രധാന സ്കൂളിൽ നിന്നു ശാഖാ സ്കൂളിലേക്ക് മാറാൻ ബുദ്ധിമുട്ടില്ല, കൂടാതെ ഇത് പുതിയ അഡ്മിഷനായി കണക്കാക്കുകയില്ല. പ്രധാന സ്കൂളിൽ ആറാം ക്ലാസ് മുതൽ 12-ാം ക്ലാസ് വരെ പ്രവർത്തിക്കുമ്പോൾ, ശാഖാ സ്കൂളുകൾക്ക് പ്രീപ്രൈമറി മുതൽ അഞ്ചാം ക്ലാസ് വരെയാണ് ക്ലാസുകൾ നടത്താൻ അനുവാദമുള്ളത്.

പ്രധാന സ്കൂളിന്റെയും ശാഖാ സ്കൂളിന്റെയും മാനേജ്മെന്റും ഉടമസ്ഥതയും ഒന്ന്തന്നെയാകും, പഠനവും അഡ്മിനിസ്ട്രേഷനും ഒരേ രീതിയിൽ പാലിക്കണമെന്നും പുതിയ ചട്ടങ്ങൾ വ്യക്തമാക്കുന്നു. സ്കൂളിന് ഒരേ വെബ്സൈറ്റ് ഉപയോഗിക്കാമെങ്കിലും, ശാഖാ സ്കൂളുകൾക്കായി അതിൽ പ്രത്യേക സെക്ഷൻ ഉണ്ടായിരിക്കണം.

അഡ്മിഷൻ നടപടികളും അക്കൗണ്ടിംഗും പ്രധാന സ്കൂൾ മേൽനോട്ടത്തിലായിരിക്കും. ശാഖാ സ്കൂളുകളിൽ അഞ്ചാം ക്ലാസ് വരെ പഠിക്കുന്ന കുട്ടികൾ ആറാം ക്ലാസിൽ പ്രധാന സ്കൂളിലേക്ക് മാറ്റപ്പെടും, ഇത് പുതിയ അഡ്മിഷനായി കണക്കാക്കില്ല. എല്ലാ അദ്ധ്യാപക, അനധ്യാപക ജീവനക്കാരുടെയും ശമ്പള വിതരണം പ്രധാന സ്കൂൾ വഴി നടക്കും.

മുമ്പ്, ഒരു ഗ്രൂപ്പിന് കീഴിൽ രണ്ടാമത്തെ സ്കൂൾ ആരംഭിക്കുമ്പോൾ പുതിയ അഫിലിയേഷൻ ആവശ്യമായിരുന്നു. ഈ വ്യവസ്ഥയിലാണ് ഇളവ് നൽകിയത്. എന്നാൽ എല്ലാ ഔദ്യോഗിക ആശയവിനിമയങ്ങളും നടത്തുന്നത് പ്രധാന സ്കൂളിന്റെ പ്രിൻസിപ്പലുമായി ആയിരിക്കുമെന്നും സിബിഎസ്ഇ പുതിയ നിബന്ധനകളിൽ വിശദീകരിക്കുന്നു.