ന്യൂഡല്‍ഹി: നൂറുകണക്കിന് മലയാളി വിദ്യാര്‍ഥികള്‍ പഠിക്കുന്ന രാജ്യതലസ്ഥാനത്തെ പ്രശസ്തമായ ഡല്‍ഹി ജാമിഅ മില്ലിയ ഇസ്‌ലാമിയ (Delhi Jamia Millia Islamia) സര്‍വകലാശാലയിലേക്കുള്ള പ്രവേശന പരീക്ഷ കേന്ദ്രങ്ങളുടെ പട്ടികയില്‍ കോഴിക്കോടിനെ ഉള്‍പ്പെടുത്തി. കേരളത്തിലെ ഏക പരീക്ഷാകേന്ദ്രമായ തിരുവനന്തപുരത്തെ ഒഴിവാക്കിയ സര്‍വകലാശാല നടപടിക്കെതിരേ ഉയര്‍ന്ന പ്രതിഷേധത്തിനൊടുവിലാണ് നടപടി.

ദക്ഷിണേന്ത്യയിലെ ഏക പരീക്ഷാ കേന്ദ്രമായിരുന്ന തിരുവനന്തപുരത്തെ പട്ടികയില്‍ നിന്ന് ഒഴിവാക്കുകയായിരുന്നു. കേരളത്തില്‍ നിന്നും ആയിരക്കണക്കിന് വിദ്യാര്‍ഥികളാണ് എല്ലാ വര്‍ഷവും ജാമിഅ മില്ലിയ എന്‍ട്രന്‍സ് പരീക്ഷ എഴുതാറുള്ളത്. ഈ സാഹചര്യത്തില്‍ കേന്ദ്രം പുനഃസ്ഥാപിക്കണമെന്ന് ആവശ്യപ്പെട്ട് കേരളത്തില്‍നിന്നുള്ള എംപിമാരും വിദ്യാര്‍ഥി സംഘടനകളും രംഗത്തെത്തിയിരുന്നു. കേരളത്തിന് പുറമെ, തമിഴ്‌നാട്, കര്‍ണാടക എന്നീ അയല്‍ സംസ്ഥാനങ്ങളിലെ കുട്ടികളും തിരുവനന്തപുരത്തെയാണ് ആശ്രയിച്ചിരുന്നത്. തിരുവനന്തപുരം ഒഴിവാക്കിയതോടെ പ്രവേശന പരീക്ഷ എഴുതണമെങ്കില്‍ മലയാളികള്‍ക്ക് ആയിരക്കണക്കിനു കിലോമീറ്ററുകള്‍ യാത്ര ചെയ്ത് ഡല്‍ഹി, കൊല്‍ക്കത്ത, ശ്രീനഗര്‍ പോലുള്ള വടക്കേ ഇന്ത്യന്‍ നഗരങ്ങളിലെത്തേണ്ടിവരുമായിരുന്നു. 

തിരുവനന്തപുരം സെന്റര്‍ ഒഴിവാക്കിയ നടപടി തിരുത്തണമെന്നാവശ്യപ്പെട്ട് മുസ് ലിം ലീഗിന്റെ രാജ്യസഭാംഗം അഡ്വ. ഹാരിസ് ബീരാന്‍ ജാമിഅ വൈസ് ചാന്‍സലര്‍ക്ക് കത്തയച്ചിരുന്നു. കേരളത്തില്‍ തിരുവനന്തപുരത്തോ കോഴിക്കോട്ടോ വര്‍ഷങ്ങളായി പരീക്ഷാ കേന്ദ്രം അനുവദിക്കാറുണ്ട്. അത് ഒഴിവാക്കുന്നത് ജാമിഅയിലെ വിവിധ കോഴ്‌സുകള്‍ക്ക് അപേക്ഷിക്കാന്‍ കാത്തിരിക്കുന്ന 2000ലധികം വിദ്യാര്‍ഥികളെയാണ് ദുരിതത്തിലാക്കുക. പ്രവേശന പരീക്ഷയ്ക്ക് മാത്രമായി വിദ്യാര്‍ഥികള്‍ ആയിരക്കണക്കിന് കിലോമീറ്ററുകള്‍ വിദൂര കേന്ദ്രങ്ങളിലേക്ക് യാത്ര ചെയ്യേണ്ടി വരും. യാത്ര, താമസം, ഭക്ഷണം എന്നിവയ്ക്കായി വലിയ സാമ്പത്തിക ബാധ്യത വിദ്യാര്‍ഥികള്‍ക്കുണ്ടാകുമെന്നുമാണ് കത്തില്‍ ഹാരിസ് ബീരാന്‍ ചൂണ്ടിക്കാട്ടിയത്.

ജാമിഅ മില്ലിയ തിരുവനന്തപുരം പ്രവേശന പരീക്ഷാ കേന്ദ്രം നിര്‍ത്തലാക്കിയ കേന്ദ്രസര്‍ക്കാര്‍ നടപടി ന്യൂനപക്ഷ വിരുദ്ധവും കേരളത്തോടുള്ള അവഗണനയുമാണെന്ന് സി.എച്ച് മുഹമ്മദ്‌കോയ എഡ്യൂക്കേഷന്‍ ട്രസ്റ്റിന്റെയും തിരുവനന്തപുരം മുസ്‌ലിം കൂട്ടായ്മ വേദിയുടെയും സംയുക്തയോഗം ചൂണ്ടിക്കാട്ടിയിരുന്നു. 

Kozhikode has been included in the list of entrance examination centres for the prestigious Jamia Millia Islamia University in Delhi, where hundreds of Malayali students study. The move comes after widespread protests against the university's move to exclude Thiruvananthapuram, the only examination centre in Kerala.