തിരുന്നാവായ (മലപ്പുറം): കടുത്ത സാമ്പത്തിക പ്രതിസന്ധിഘട്ടത്തിലും ബാറുടമകൾക്ക് നികുതി കുടിശ്ശിക ഇനത്തിൽ കോടികൾ ഇളവുനൽകി സർക്കാർ. 2005 മുതൽ 2021 വരെയുള്ള കുടിശ്ശികകൾക്ക് ആംനസ്റ്റി, പിഴപ്പലിശ എന്നിവയിൽ  വൻ ഇളവ് പ്രഖ്യാപിച്ച് ഗസറ്റ് വിജ്ഞാപനം പുറത്തിറങ്ങിയിരിക്കുകയാണ്. ഇതോടെ, 2005 മുതൽ എക്സൈസ് വകുപ്പ് നടത്തിയ ബാർ പരിശോധനകൾ പ്രഹസനമായി. പഞ്ചനക്ഷത്ര ഹോട്ടലുകൾക്ക് വരെ ഈ ഇളവ് ലഭിക്കും. 

ആദ്യമായാണ് സംസ്ഥാനത്ത് ബാറുകൾക്ക് ഇങ്ങനെ ആംനസ്റ്റി നൽകുന്നത്. സർക്കാരിന് ബാർ ഉടമകൾ അടയ്ക്കാനുള്ള നികുതി കുടിശ്ശികയിൽ നിന്ന് വലിയൊരു തുക ഒഴിവാക്കി നൽകാനാണ് നീക്കം. ഇതോടുകൂടി ബാർ ഉടമകളിൽ നിന്ന് ഖജനാവിലേക്ക് എത്തേണ്ട നികുതിപ്പണത്തിൽ ഗണ്യമായ കുറവുണ്ടാകും.ഖജനാവ് നിറയ്ക്കാൻ സാധാരണക്കാരുടെ മേൽ അധികനികുതി ഭാരം ചുമത്തുമ്പോഴാണ് കോടികളുടെ വരുമാനം ഒഴിവാക്കി സർക്കാർ മദ്യവ്യവസായികളെ തലോടുന്നത്. അവർക്ക് കോടികളുടെ ലാഭമുണ്ടാക്കുന്ന നടപടിയാണ് സർക്കാർ സ്വീകരിക്കുന്നത്.

ബാർ ഉടമകൾക്ക് ഇത്രയും വലിയ സൗജന്യം ലഭിക്കുന്നത് ഇതാദ്യമാണ്. കൊവിഡ് കാലത്ത് ചില ചെറിയ ഇളവുകൾ മാത്രമാണ് മുമ്പ് നൽകിയിട്ടുള്ളത്. ഇപ്പോൾ ഇത്രയും വലിയ ഇളവ് നൽകുന്നതിന് പിന്നിൽ തെരഞ്ഞെടുപ്പ് ലക്ഷ്യമിട്ടുള്ള ഫണ്ട് പിരിവാണെന്ന ആരോപണം ഉയരുന്നുണ്ട്. 

കൃത്യമായി റിട്ടേൺ ഫയൽ ചെയ്ത് നികുതി ഒടുക്കാത്ത ബാറുകൾക്കും പലിശയിൽ 50 ശതമാനവും പിഴയിൽ പൂർണമായും ഇളവ് നൽകുന്നതിനാണ് നീക്കം. കൃത്യമായി നികുതി അടക്കുന്ന ബാർ ഉടമകളെ കൂടി അതിൽ നിന്ന് പിന്തിരിപ്പിക്കുന്ന നടപടിയാണിതെന്നും വിലയിരുത്തുന്നുണ്ട്.