വണ്ടിപ്പെരിയാർ: ഇടുക്കി വണ്ടിപ്പെരിയാർ ​ഗ്രാമ്പിയിൽ ജനവാസ മേഖലയിൽ ഇറങ്ങിയ കടുവയെ പിടികൂടാനുള്ള ദൗത്യം ഇന്നും തുടരും. കടുവയുടെ നില ഗുരുതരമായി നിലവിൽ തുടരുകയാണ്. കാലിൽ പരിക്കുള്ളതിനാൽ നടക്കാനും ഇര തേടാനും കഴിയാത്ത അവസ്ഥയിലാണ്. മയക്കുവെടി ഉപയോഗിച്ച് കടുവയെ കീഴടക്കാൻ വ്യാപകമായ തെരച്ചിൽ നടക്കുകയാണ്. 

മനുഷ്യ സാമീപ്യം കടുവയെ അക്രമാസക്തമാക്കാൻ ഇടയാക്കുമെന്നതിനാൽ, അപകട സാധ്യത ഒഴിവാക്കാനുള്ള മുൻകരുതലായി ഇന്ന് രാവിലെ 6 മുതൽ വൈകുന്നേരം 6 വരെ വണ്ടിപ്പെരിയാർ ഗ്രാമപഞ്ചായത്തിന്റെ പതിനഞ്ചാം വാർഡിൽ നിരോധനാജ്ഞ ജില്ലാ കളക്ടർ പ്രഖ്യാപിച്ചു. വ്യക്തികളുടെ സന്ദർശനവും അനാവശ്യ ഗതാഗതവും നിയന്ത്രിക്കുന്നതിനാണ് ഈ നടപടി

ഇന്ന് രാവിലെ നടത്തിയ ഡ്രോൺ നിരീക്ഷണത്തിൽ കടുവയെ കണ്ടെത്താൻ കഴിഞ്ഞിട്ടില്ലെന്ന് അധികൃതർ അറിയിച്ചു. ഇന്നലെ കണ്ട സ്ഥലത്തുനിന്ന് കടുവ മാറിയതായി എരുമേലി റേഞ്ച് ഫോറസ്റ്റ് ഓഫീസർ കെ. ഹരിലാൽ പറഞ്ഞു. കടുവ കൂടുതൽ ദൂരം സഞ്ചരിച്ചിട്ടുണ്ടാകില്ലെങ്കിലും, മൂടൽമഞ്ഞ് തെരച്ചിലിന് വെല്ലുവിളിയാകുന്നുവെന്നും അദ്ദേഹം കൂട്ടിച്ചേർത്തു.

കടുവയുടെ ആരോഗ്യനില ഗുരുതരമാണെന്നും കാലിൽ പരിക്കേറ്റതിനാൽ നടക്കാനോ ഇര തേടാനോ കഴിയാത്ത അവസ്ഥയിലാണെന്നും വനം വകുപ്പ് വ്യക്തമാക്കി. മയക്കുവെടി വെച്ച് പിടികൂടി തേക്കടിയിലേക്ക് മാറ്റി ചികിത്സ നൽകാനാണ് തീരുമാനം. ഡോക്ടർമാരുടെ നിർദ്ദേശപ്രകാരം തുടർചികിത്സ ഉറപ്പാക്കുമെന്നും അധികൃതർ അറിയിച്ചു.