കണ്ണൂര്‍: പാപ്പിനിശ്ശേരിയില്‍ നാലുമാസം പ്രായമായ കുഞ്ഞിനെ കിണറ്റിലെറിഞ്ഞ് കൊന്നത് ബന്ധുവായ പന്ത്രണ്ടുകാരിയെന്ന് പൊലിസ്. കൊല്ലപ്പെട്ട കുഞ്ഞിന്റെ പിതൃ സഹോദരിയുടെ മകളാണ് ക്രൂരകൃത്യം ചെയ്തത്. ഉറങ്ങിക്കിടന്ന കുഞ്ഞിനെ എടുത്ത് കിണറ്റിലേക്ക് വലിച്ചെറിഞ്ഞെന്ന് പെണ്‍കുട്ടി കുറ്റസമ്മതം നടത്തി. കുട്ടിയെ ജുവനൈല്‍ ജസ്റ്റിസ് ബോര്‍ഡിന് മുന്നില്‍ ഹാജരാക്കുമെന്ന് പൊലിസ് പറഞ്ഞു. 

തമിഴ്‌നാട് സ്വദേശികളായ മുത്തു- അക്കമ്മല്‍ ദമ്പതികളുടെ മൂന്നാമത്തെ കുഞ്ഞാണ് കൊല്ലപ്പെട്ടത്. മുത്തുവിന്റെ സഹോദരിയുടെ മകളാണ് പ്രതിയാ പന്ത്രണ്ടുകാരി. മാതാപിതാക്കള്‍ മരിച്ചതോടെ പെണ്‍കുട്ടി മുത്തുവിനും ഭാര്യക്കുമൊപ്പമായിരുന്നു താമസം. ഇവരുടെ ജീവിതത്തിലേക്ക് പുതിയ കുഞ്ഞ് വന്നതോടെ തന്നോടുള്ള സ്‌നേഹം കുറയുമോയെന്ന ഭയമാണ് പെണ്‍കുട്ടിയെ ക്രൂരകൃത്യത്തിന് പ്രേരിപ്പിച്ചതെന്നാണ് പൊലിസ് നിഗമനം.

ഇന്നലെ രാത്രി പത്തുമണിയോടെയാണ് കുഞ്ഞിനെ കാണാതാവുന്നത്. തുടര്‍ന്ന് ഇവര്‍ പൊലിസില്‍ പരാതി നല്‍കുകയും ചെയ്തു. പിന്നാലെ പൊലിസും, നാട്ടുകാരും ചേര്‍ന്ന് തിരച്ചിലിനിറങ്ങി. തുടര്‍ന്ന് പന്ത്രണ്ടുമണിയോടെ കുഞ്ഞിന്റെ മൃതദേഹം ഇവര്‍ താമസിക്കുന്ന വാടക വീടിന്റെ സമീപത്തെ  കിണറ്റില്‍ നിന്ന് കണ്ടെത്തുകയായിരുന്നു. ഉടന്‍ തന്നെ കുഞ്ഞിനെ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല.

kerala police arrest 12 year old girl for murdering 4 month infant in kannur