തിരുവനന്തപുരം: വർക്കലയിൽ സ്കൂളിലേക്ക് അതിക്രമിച്ച് കയറി ഹെഡ്മാസ്റ്ററെ മർദ്ദിച്ച 20 വയസുകാരൻ പൊലീസിന്റെ പിടിയിൽ. തോണിപ്പാറ സ്വദേശി രഞ്ജിത്തിനെയാണ് അയിരൂർ പൊലീസ് അറസ്റ്റ് ചെയ്തത്. പ്രതി ലഹരിക്ക് അടിമയായിരുന്നുവെന്നാണ് പൊലീസിന്റെ പ്രാഥമിക നിഗമനം.

വർക്കല ഹരിഹരപുരം സെന്റ് തോമസ് യു.പി. സ്കൂളിൽ ഇന്ന് വൈകുന്നേരം 4 മണിയോടെയായിരുന്നു സംഭവം. രണ്ട് കൂട്ടാളികളോടൊപ്പം ബൈക്കിലെത്തിയ പ്രതി സ്കൂളിനു മുൻവശത്തെ ഒരു കാറിന്റെ ചില്ലുകൾ അടിച്ച് തകർക്കുകയായിരുന്നു. കുട്ടികളെ ഭീതിയിലാഴ്ത്തിയ ഇയാളെ ഹെഡ്മാസ്റ്റർ തടയാൻ ശ്രമിച്ചപ്പോൾ പ്രതി അദ്ദേഹത്തെ ക്രൂരമായി മർദ്ദിച്ചു.

സ്കൂളിലേക്ക് അതിക്രമിച്ച് കയറി ജനലുകളും വാതിലുകളും തകർക്കാനും ബഹളമുണ്ടാക്കാനും പ്രതി ശ്രമിച്ചു. തുടർന്ന് രക്ഷപ്പെടാൻ ശ്രമിച്ച രഞ്ജിത്തിനെ നാട്ടുകാർ പിന്തുടർന്ന് പിടികൂടി പൊലീസിന് കൈമാറി. അക്രമത്തിൽ പരിക്കേറ്റ ഹെഡ്മാസ്റ്റർ വർക്കല താലൂക്ക് ആശുപത്രിയിൽ ചികിത്സ തേടി.

A 20-year-old youth was arrested for forcibly entering a school and assaulting the headmaster in Varkala. The accused, identified as Ranjith from Thonipara, was allegedly under the influence of drugs, police said.