സംസ്ഥാനത്ത് ഇന്നും മഴ തുടരും. ചിലയിടങ്ങളില്‍ ഇടിയോടു കൂടിയ മഴക്ക് സാധ്യതയെന്നാണ് റിപ്പോര്‍ട്ട്. തെക്കന്‍ ജില്ലകളില്‍ ഉച്ചയ്ക്ക് ശേഷം ഇടിയോടെ മഴയുണ്ടാവാന്‍ സാധ്യതയുണ്ടെന്നും റിപ്പോര്‍ട്ടുകള്‍ വ്യക്തമാക്കുന്നു. തെക്കന്‍ കേരളത്തില്‍ ഈരാറ്റുപേട്ട, വൈക്കം, കറുകച്ചാല്‍, ചെങ്ങന്നൂര്‍, കായംകുളം, പൈനാവ്, ആലപ്പുഴ, കാഞ്ഞിരപ്പള്ളി, കോട്ടയം, തിരുവല്ല, മാവേലിക്കര, കായംകുളം, ഏറ്റുമാനൂര്‍, ഉഴവൂര്‍, മുട്ടം, കാഞ്ഞിരപ്പള്ളി, എടമലക്കുടി, ളാഹ, കിളിമാനൂര്‍, ആയൂര്‍, പുനലൂര്‍ തുടങ്ങിയ പ്രദേശങ്ങളിലും വടക്കന്‍ കേരളത്തിലെ താമരശ്ശേരി, മുക്കം, അത്തോളി, നടുവണ്ണൂര്‍, കുന്നമംഗലം, പൂവാറന്‍തോട്, തുഷാരഗിരി, തലയാട്, ബാലുശ്ശേരി, എലത്തൂര്‍, കക്കയം, വയനാട്ടിലെ ലക്കിടി , കണ്ണൂരിലെ മട്ടന്നൂര്‍, ഇരിട്ടി, പേരാവൂര്‍, പയ്യാവൂര്‍ എന്നിവിടങ്ങളിലും ഇടിയോടു കൂടിയ മഴ പ്രവചിക്കുന്നു. 

മധ്യ കേരളത്തില്‍ കൊച്ചി, തൃശൂര്‍, പറവൂര്‍, കോതമംഗലം, ഇരിങ്ങാലക്കുട എന്നിവിടങ്ങളിലും ഇടിയോടെ മഴയുണ്ടാവുമെന്നാണ് റിപ്പോര്‍ട്ടില്‍ സൂചിപ്പിക്കുന്നത്.

സംസ്ഥാനത്ത് ശനിയാഴ്ച മുതല്‍ വേനല്‍ മഴ സജീവമാകും. ഒറ്റപ്പെട്ടയിടങ്ങളില്‍ മഴക്കൊപ്പം മണിക്കൂറില്‍ 40 കിലോമീറ്ററില്‍ താഴെ വരെ വേഗതയില്‍ ശക്തമായ കാറ്റിനും സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പ് അറിയിക്കുന്നു.

ശനിയാഴ്ചയും ഞായറാഴ്ചയും ഇടിമിന്നലോടു കൂടിയ ശക്തമായ മഴയ്ക്കും മണിക്കൂറില്‍ 40 കിലോമീറ്റര്‍ മുതല്‍ 50 കിലോമീറ്റര്‍ വരെ വേഗതയില്‍ ശക്തമായ കാറ്റിനും സാധ്യതയുണ്ടെന്നും അറിയിപ്പില്‍ പറയുന്നു. ഇടിമിന്നല്‍ അപകടകാരികളായതിനാല്‍ ജനങ്ങള്‍ ജാഗ്രത പാലിക്കണമെന്നും നിര്‍ദ്ദേശമുണ്ട്.

Kerala is expected to experience continuous rain today, with thunderstorms and lightning in several regions.