പത്തനംതിട്ട: നാരങ്ങാനം വില്ലേജ് ഓഫീസർ ജോസഫ് ജോർജ് നാളെ മുതൽ ജോലിയിൽ പ്രവേശിക്കുമെന്ന് അറിയിച്ചു. നേരത്തെ, സിപിഎം പത്തനംതിട്ട ഏരിയ സെക്രട്ടറി എം.വി. സഞ്ജുവിന്റെ ഭീഷണി നേരിട്ടതായി ആരോപിച്ചിരുന്ന ജോസഫ് ജോർജിന് അണികളിൽ നിന്ന് പ്രശ്നമൊന്നുമുണ്ടാകില്ലെന്ന് ഏരിയാ സെക്രട്ടറി ഉറപ്പ് നൽകിയതായി അദ്ദേഹം അറിയിച്ചു. കൂടാതെ, നികുതി കുടിശ്ശിക അടയ്ക്കാമെന്നും എം.വി. സഞ്ജു അറിയിച്ചെന്ന് വില്ലേജ് ഓഫീസർ പറഞ്ഞു.

വില്ലേജ് ഓഫീസർ നികുതി കുടിശ്ശിക ആവശ്യപ്പെട്ടതിനെത്തുടർന്ന് അദ്ദേഹത്തെ ഭീഷണിപ്പെടുത്തിയെന്ന ആരോപണം നേരത്തെ വലിയ വിവാദമായിരുന്നു. "ഓഫീസിൽ കയറി വെട്ടുമെന്ന്" ഏരിയാ സെക്രട്ടറിയുടെ ഭീഷണിയെത്തുടർന്ന് ജോസഫ് ജോർജ് അവധിയിൽ പ്രവേശിച്ചിരുന്നു. അതേസമയം, ഉദ്യോഗസ്ഥൻ കൈക്കൂലിക്കാരനാണെന്ന് സിപിഎം ആരോപിച്ചിരുന്നു.

സ്ഥലംമാറ്റം ആവശ്യപ്പെട്ട് അപേക്ഷ

സിപിഎം ഏരിയാ സെക്രട്ടറി ഭീഷണിപ്പെടുത്തിയെന്ന ആരോപണത്തിനുപുറമേ, നാരങ്ങാനം വില്ലേജ് ഓഫീസിൽ ജോലി ചെയ്യാൻ ഭയമാണ് എന്നാവശ്യപ്പെട്ട് ജോസഫ് ജോർജ് നേരത്തെ പത്തനംതിട്ട ജില്ലാ കളക്ടർക്കു അപേക്ഷ നൽകിയിരുന്നു. അവധി അപേക്ഷയോടൊപ്പം സ്ഥലംമാറ്റം ആവശ്യപ്പെട്ടതായും അദ്ദേഹം വ്യക്തമാക്കി.

ഭീഷണി ഫോൺ കോളുകൾ ലഭിച്ചെന്ന പരാതിയും ജില്ലാ കളക്ടർ പൊലീസിന് കൈമാറിയിരുന്നു.