കോഴിക്കോട്:  മെയ് 10 ന് കോഴിക്കോട് എയർപോർട്ടിൽ നിന്ന് ഹജ്ജ് യാത്രയ്ക്കായി പുറപ്പെടുന്ന തീർഥാടകർക്ക് ലഗേജ് ഭാരത്തിൽ കർശന നിയന്ത്രണം. ഐഎക്സ് 3011, ഐഎക്സ് 3031 വിമാനങ്ങളിൽ യാത്ര ചെയ്യുന്ന ഹാജിമാർക്ക് പരമാവധി 30 കിലോ ലഗേജ് (15 കിലോ വീതമുള്ള രണ്ട് ബാഗുകൾ) മാത്രമേ അനുവദിക്കൂ. ഹാൻഡ് ബാഗിന്റെ ഭാരം ഏഴ് കിലോയിൽ കവിയാൻ പാടില്ലെന്നും കേരള സ്റ്റേറ്റ് ഹജ്ജ് കമ്മിറ്റി അറിയിച്ചു.

നിലവിലെ ഇന്ത്യ- പാക് സംഘർഷ സാഹചര്യം കണക്കിലെടുത്ത് രാജ്യത്ത് വിമാന സർവീസുകൾക്ക് എയർ ട്രാഫിക് നിയന്ത്രണം ഏർപ്പെടുത്തിയിട്ടുണ്ട്. ഇതിന്റെ ഭാഗമായി എയർലൈൻ അധികൃതർ ലഗേജ് ഭാരത്തിൽ പുതിയ മാർഗനിർദേശങ്ങൾ പുറപ്പെടുവിച്ചതായി കമ്മിറ്റി വ്യക്തമാക്കി. ഒരു കാരണവശാലും അനുവദനീയമായ ഭാരത്തിനപ്പുറം ലഗേജ് അനുവദിക്കില്ലെന്നും ഹാജിമാർ ഈ നിർദേശങ്ങൾ കൃത്യമായി പാലിക്കണമെന്നും അധികൃതർ നിർദേശിച്ചു.

തുടർന്നുള്ള ദിവസങ്ങളിലെ വിമാന സർവീസുകൾ സംബന്ധിച്ച വിവരങ്ങൾ എയർലൈൻസിൽ നിന്ന് ലഭിക്കുന്ന മുറയ്ക്ക് അറിയിക്കും. ഹാജിമാർക്കുള്ള എല്ലാ നിർദേശങ്ങളും അതത് ഫ്ലൈറ്റിലെ സ്റ്റേറ്റ് ഹജ്ജ് ഇൻസ്‌പെക്ടർ മുഖേന അറിയിക്കുമെന്നും കേരള സ്റ്റേറ്റ് ഹജ്ജ് കമ്മിറ്റി പ്രസ്താവനയിൽ പറഞ്ഞു.