മലപ്പുറം: വളാഞ്ചേരി സ്വദേശിനിയായ 42-കാരിക്ക് നിപ വൈറസ് ബാധ സ്ഥിരീകരിച്ചതിനെ തുടർന്ന് മലപ്പുറം ജില്ലയിൽ കർശന നിയന്ത്രണങ്ങൾ. വളാഞ്ചേരി നഗരസഭയിലെ രണ്ടാം വാർഡിൽ മൂന്ന് കിലോമീറ്റർ ചുറ്റളവിൽ കോൺടൈൻമെന്റ് സോൺ പ്രഖ്യാപിക്കും. മറാക്കര, എടയൂർ പഞ്ചായത്തുകളിലും നിയന്ത്രണങ്ങൾ ഏർപ്പെടുത്തി. ജില്ലയിൽ എല്ലാവരും മാസ്ക് ധരിക്കണമെന്ന് ആരോഗ്യമന്ത്രി വീണ ജോർജ് നിർദേശിച്ചു. രോഗ പ്രതിരോധത്തിനായി 25 കമ്മിറ്റികൾ രൂപീകരിച്ച് ഫീവർ സർവേലൻസ് ഊർജിതമാക്കി.

പെരിന്തൽമണ്ണയിലെ ആശുപത്രിയിൽ ചികിത്സയിലുള്ള രോഗി വെന്റിലേറ്ററിൽ തുടരുകയാണ്. കഴിഞ്ഞ നാല് ദിവസമായി പനിയും ശ്വാസ തടസ്സവും അനുഭവപ്പെട്ടതിനെ തുടർന്നാണ് യുവതിയെ ആശുപത്രിയിൽ പ്രവേശിപ്പിച്ചത്. നിപ ലക്ഷണങ്ങൾ കണ്ടതോടെ സ്രവം പരിശോധനയ്ക്കായി പുനെ വൈറോളജി ലാബിലേക്ക് അയച്ചിരുന്നു. പരിശോധനയിൽ വൈറസ് ബാധ സ്ഥിരീകരിക്കുകയായിരുന്നു. നിപ സംശയിച്ചതിനാൽ രോഗിക്ക് ആവശ്യമായ ചികിത്സ നേരത്തെ ആരംഭിച്ചിരുന്നു. മോണോക്ലോണൽ ആന്റിബോഡി നൽകാനും തീരുമാനിച്ചു. ഹൈ റിസ്ക് വിഭാഗത്തിൽപ്പെട്ട ഏഴ് പേരുടെ സാമ്പിളുകൾ പരിശോധിച്ചതിൽ എല്ലാവരുടെയും ഫലം നെഗറ്റീവാണ്. രോഗിയുമായി സമ്പർക്കം പുലർത്തിയവർക്ക് പനി ലക്ഷണങ്ങൾ ഉണ്ടെങ്കിലും അവരുടെ പരിശോധനാഫലവും നെഗറ്റീവാണ്.

രോഗി വീട്ടിൽനിന്ന് അധികം പുറത്തുപോയിട്ടില്ലെന്നും വൈറസിന്റെ ഉറവിടം കണ്ടെത്താൻ പരിശോധനകൾ തുടരുകയാണെന്നും മന്ത്രി വ്യക്തമാക്കി. ഉറവിടം സംബന്ധിച്ച് ചില സംശയങ്ങൾ ഉള്ളതിനാൽ സാമ്പിളുകൾ ഭോപ്പാൽ ലാബിലേക്ക് അയക്കും. ജില്ലയിൽ അസ്വാഭാവിക മരണങ്ങൾ റിപ്പോർട്ട് ചെയ്തിട്ടില്ല. ഒന്നാം തീയതി വളാഞ്ചേരി ആശുപത്രിയിൽ എത്തിയ രോഗിയെ രണ്ടാം തീയതി ഇൻക്യുബേറ്റ് ചെയ്തിരുന്നു. എൻ്റെ കേരളം മേളയിൽ പങ്കെടുക്കുന്നവർ മാസ്ക് ധരിക്കുകയും സാമൂഹിക അകലം പാലിക്കുകയും വേണമെന്ന് മന്ത്രി അറിയിച്ചു. ആരോഗ്യ വകുപ്പ് സ്ഥിതിഗതികൾ നിരന്തരം നിരീക്ഷിച്ചുവരുന്നു.