പ്ലസ് ടു പരീക്ഷ അവസാനിച്ചല്ലോ. എല്ലാവര്‍ക്കും വിജയാശംസകള്‍ നേരുന്നു. ശേഷമെന്തെന്നു ഇപ്പോള്‍  ചിന്തിച്ചു തുടങ്ങുന്നവരുമുണ്ടാകും . പല പ്രവേശന പരീക്ഷകളുടെയും സമയം കഴിഞ്ഞുവെങ്കിലും ഇനിയും അപേക്ഷിക്കാവുന്ന നിരവധി മേഖലകളുണ്ട്. പല വിജ്ഞാപനങ്ങളും ഇനിയും പ്രസിദ്ധീകരിക്കാനുണ്ട്. പ്രധാനപ്പെട്ട സാധ്യതകളെക്കുറിച്ച് വിശദീകരിക്കുകയാണിവിടെ.

ഇപ്പോള്‍ അപേക്ഷിക്കാം

ശാസ്ത്ര മേഖലയിലെ മികവുറ്റ സ്ഥാപനങ്ങളായ ഇന്ത്യന്‍ ഇന്‍സ്റ്റിറ്റ്യൂട്ട് ഓഫ് സയന്‍സ് എജ്യൂക്കേഷന്‍ ആന്‍ഡ് റിസര്‍ച്ചിലെ (IISER) വിവിധ പ്രോഗ്രാമുകള്‍ക്കുള്ള പ്രവേശന പരീക്ഷയായ ഐസര്‍ ആപ്റ്റിറ്റിയൂഡ് ടെസ്റ്റിന് (IAT) ഏപ്രില്‍ 15 വരെ അപേക്ഷിക്കാം (www.iiseradmission.in ). കേന്ദ്ര ആണവോര്‍ജ്ജ വകുപ്പിനു കീഴില്‍ പ്രവര്‍ത്തിക്കുന്ന ഭുവനേശ്വരിലെ നാഷനല്‍ ഇന്‍സ്റ്റിറ്റ്യൂട്ട് ഓഫ് സയന്‍സ് എജ്യൂക്കേഷന്‍ ആന്‍ഡ് റിസര്‍ച് (NISER), മുംബൈയിലെ യൂനിവേഴ്‌സിറ്റി ഓഫ് മുംബൈ  ഡിപ്പാര്‍ട്ട്‌മെന്റ് ഓഫ് അറ്റോമിക് എനര്‍ജി സെന്റര്‍ ഫോര്‍ എക്‌സലന്‍സ് ഇന്‍ ബേസിക് സയന്‍സസ് (UM DAE CEBS) എന്നീ സ്വയംഭരണ സ്ഥാപനങ്ങളില്‍ അഞ്ച് വര്‍ഷ ഇന്റഗ്രേറ്റഡ് മാസ്റ്റേഴ്‌സ് പ്രോഗ്രാമുകള്‍ക്കുള്ള പ്രവേശന പരീക്ഷയായ നാഷനല്‍ എന്‍ട്രന്‍സ് സ്‌ക്രീനിങ് ടെസ്റ്റിന് (NEST) മെയ് ഒന്‍പത് വരെ അപേക്ഷിക്കാം (www.nestexam.in ).

ഇന്ത്യന്‍ ഇന്‍സ്റ്റിറ്റ്യൂട്ട് ഓഫ് സയന്‍സസ് , ബെംഗളൂരുവിലെ ബാച്‌ലര്‍ ഓഫ് സയന്‍സ് (റിസര്‍ച്), ബി.ടെക് മാത്തമാറ്റിക്‌സ് ആന്‍ഡ് കംപ്യൂട്ടിങ് പ്രോഗ്രാമുകള്‍ക്ക് മെയ് ഒന്നിനും ജൂണ്‍ ആറിനുമിടയില്‍ അപേക്ഷിക്കാം (admissions.iisc.ac.in).

ബിര്‍ള ഇന്‍സ്റ്റിറ്റ്യൂട്ട് ഓഫ് ടെക്‌നോളജി ആന്‍ഡ് സയന്‍സിലെ (BITS) വിവിധ ഇന്റഗ്രേറ്റഡ് ഫസ്റ്റ് ഡിഗ്രി പ്രോഗ്രാമുകളുടെ
പ്രവേശനപരീക്ഷയായ ബിറ്റ്‌സാറ്റ് 2025 ന് ഏപ്രില്‍ 18 വരെ അപേക്ഷിക്കാം. രണ്ടാം സെഷന് മാത്രമായി മെയ് 26 മുതല്‍ ജൂണ്‍ 10 വരെയും (www.bitsadmission.com).

ചെന്നൈ മാത്തമാറ്റിക്കല്‍ ഇന്‍സ്റ്റിറ്റ്യൂട്ടില്‍ (സി.എം.ഐ) മാത്തമാറ്റിക്‌സ് ആന്‍ഡ് കംപ്യൂട്ടര്‍ സയന്‍സ്, മാത്തമാറ്റിക്‌സ് ആന്‍ഡ് ഫിസിക്‌സ് എന്നിവയിലെ ബി.എസ്.സി ഓണേഴ്‌സ് പ്രോഗ്രാമുകളുടെ പ്രവേശന പരീക്ഷക്ക് ഏപ്രില്‍ 15 വരെ അപേക്ഷിക്കാം (www.cmi.ac.in).

ഇന്ത്യന്‍ മാരിടൈം യൂനിവേഴ്‌സിറ്റിയുടെ കൊച്ചി, ചെന്നൈ, കൊല്‍ക്കത്ത, വിശാഖപട്ടണം, നവി മുംബൈ, മുബൈ പോര്‍ട്ട് എന്നീ കാംപസുകളിലെ വിവിധ പ്രോഗ്രാമുകള്‍ക്കുള്ള പ്രവേശന പരീക്ഷയായ ഇന്ത്യന്‍ മാരിടൈം യൂനിവേഴ്‌സിറ്റി കോമണ്‍ എന്‍ട്രന്‍സ് ടെസ്റ്റിന് (IMU CET) മെയ് രണ്ട് വരെ അപേക്ഷിക്കാം (www.imu.edu.in ).

ഐ.ഐ.എം രോത്തക്കിലെ ഇന്റഗ്രേറ്റഡ് പ്രോഗ്രാം ഇന്‍ മാനേജ്‌മെന്റ് (ഐ.പി.എം) പ്രവേശനത്തിന് ഏപ്രില്‍ 11 വരെയും (iimrohtak.ac.in) ഐ.ഐ.എം റാഞ്ചിയിലെ പ്രവേശനത്തിന് ഏപ്രില്‍ 12 വരെയും (പ്രവേശനം ഐ.പി മാറ്റ് ഇന്‍ഡോര്‍ സ്‌കോര്‍ പരിഗണിച്ച്  iimranchi.ac.in) അപേക്ഷിക്കാം.

 അമേത്തിയിലെ ഇന്ദിരാ ഗാന്ധി രാഷ്ട്രീയ ഉറാന്‍ അക്കാദമിയിലെ കൊമേഴ്‌സ്യല്‍ പൈലറ്റ് ലൈസന്‍സ് (CPL) പരിശീലന പ്രോഗ്രാമിനും എയര്‍ക്രാഫ്റ്റ് മെയ്ന്റനന്‍സ് എന്‍ജിനീയറിങ് പ്രോഗ്രാമിനും മെയ് രണ്ടുവരെ അപേക്ഷിക്കാം (igrua.gov.in).

കൊല്ലം കുണ്ടറയില്‍ പ്രവര്‍ത്തിക്കുന്ന ഇന്‍സ്റ്റിറ്റ്യൂട്ട് ഓഫ് ഫാഷന്‍ ടെക്‌നോളജി കേരളയില്‍ (ഐ.എഫ്.ടി.കെ) നാലുവര്‍ഷം ബി.ഡിസ് പ്രോഗ്രാമുകള്‍ക്ക് മെയ് 31 വരെ അപേക്ഷിക്കാം. (lbsapplications.kerala.gov.in/iftk2025).

 ഫുട്‌വെയര്‍ ഡിസൈന്‍ ആന്‍ഡ് ഡെവലപ്‌മെന്റ് ഇന്‍സ്റ്റിറ്റ്യൂട്ടിന്റെ (എഫ്. ഡി.ഡി.ഐ ) 12 കാംപസുകളിലെ വിവിധ ബി.ഡിസ് പ്രോഗ്രാമുകളുടെ പ്രവേശന പരീക്ഷയായ ആള്‍ ഇന്ത്യ സെലക്ഷന്‍ ടെസ്റ്റിന് (എ.ഐ.എസ്.ടി 2025) ഏപ്രില്‍ 20 വരെ അപേക്ഷിക്കാം (fddiadmissions.qualcampus.com).

കാലിക്കറ്റ് സര്‍വകലാശാലാ പഠന വകുപ്പിലെ വിവിധ ഇന്റഗ്രേറ്റഡ് പ്രോഗ്രാമുകളുടെ പ്രവേശനത്തിനുള്ള കോമണ്‍ എന്‍ട്രന്‍സ് ടെസ്റ്റിന് ഏപ്രില്‍ 15 വരെ അപേക്ഷിക്കാം (admission.uoc.ac.in).

 കേരള സംസ്ഥാന ടൂറിസം വകുപ്പിനു കീഴില്‍ പ്രവര്‍ത്തിക്കുന്ന കേരള ഇന്‍സ്റ്റിറ്റ്യൂട്ട് ഓഫ് ടൂറിസം ആന്‍ഡ് ട്രാവല്‍ സ്റ്റഡീസിലെ (KITTS) വിവിധ ഡിപ്ലോമ കോഴ്‌സുകള്‍ക്ക് ജൂണ്‍ 15 വരെ അപേക്ഷിക്കാം (www.kitts.edu.org).

വരും ദിവസങ്ങളിലും പ്ലസ്ടുക്കാര്‍ക്കുള്ള വിവിധ വിജ്ഞാപനങ്ങള്‍ പ്രതീക്ഷിക്കാം. യഥാസമയം അപേക്ഷ സമര്‍പ്പിക്കാന്‍ മറക്കരുത്. കേരള, മഹാത്മ ഗാന്ധി, കോഴിക്കോട്, കണ്ണൂര്‍ സര്‍വകലാശാലകളുടെ കീഴിലുള്ള അഫിലിയേറ്റഡ് കോളജുകളില്‍
വിവിധ ബിരുദ, ഇന്റഗ്രേറ്റഡ് കോഴ്‌സുകള്‍ക്ക് അവസരമുണ്ട്. പ്ലസ് ടു മാര്‍ക്കടിസ്ഥാനത്തിലാണ് പ്രവേശനം. ഓരോ സര്‍വകലാശാലയും നടത്തുന്ന കേന്ദ്രീകൃത അലോട്ട്‌മെന്റ് പ്രക്രിയ വഴിയാണ് പ്രവേശനം. എന്നാല്‍ വിവിധ സര്‍വകലാശാലകള്‍ക്കു കീഴിലുള്ള ഓട്ടോണമസ് കോളജുകളുടെ പ്രവേശനത്തിന് അതത് കോളജുകളില്‍ നേരിട്ട് അപേക്ഷ സമര്‍പ്പിക്കേണ്ടതുണ്ട്. ശ്രീ ശങ്കരാചാര്യ സംസ്‌കൃത സര്‍വകലാശാലയിലും (ssus.ac.in) കേരള കലാമണ്ഡലം കല്‍പ്പിത സര്‍വകലാശാലയിലും (www.kalamandalam.ac.in) വിവിധ പ്രോഗ്രാമുകള്‍ക്ക് അപേക്ഷിക്കാം.

കൂടാതെ കേരളത്തിലെ സര്‍ക്കാര്‍/എയ്ഡഡ്, സ്വാശ്രയ ടീച്ചര്‍ ട്രെയിനിങ് ഇന്‍സ്റ്റിറ്റ്യൂട്ടുകളില്‍ രണ്ടുവര്‍ഷത്തെ ഡിപ്ലോമ ഇന്‍ എലിമെന്ററി എജ്യൂക്കേഷന്‍ (ഡി.എല്‍.എഡ്) പ്രോഗ്രാമിനും അവസരമുണ്ട്.

കൊല്‍ക്കത്തയിലെ ജാദവ്പൂരിലുള്ള ഇന്ത്യന്‍ അസോസിയേഷന്‍ ഫോര്‍ ദി കള്‍ട്ടിവേഷന്‍ ഓഫ് സയന്‍സില്‍ (IACS) ഇന്റഗ്രേറ്റഡ് ബാച്‌ലര്‍ ഓഫ് സയന്‍സ്  മാസ്റ്റര്‍ ഓഫ് സയന്‍സ് പ്രോഗ്രാമിനുള്ള പ്രവേശന പരീക്ഷയുടെ വിജ്ഞാപനവും ഉടന്‍ പ്രതീക്ഷിക്കാം.(www.iacs.res.in).

നിയമമേഖലയില്‍ പ്രവേശനമാഗ്രഹിക്കുന്ന വിദ്യാര്‍ഥികള്‍ക്ക് കേരളത്തിലെ നാല് സര്‍ക്കാര്‍ ലോ കോളജുകളിലും മറ്റു സ്വകാര്യ ലോ കോളേജുകളിലും പഞ്ചവത്സര നിയമ ബിരുദ പ്രോഗ്രാമുകള്‍ക്കുള്ള പ്രവേശന പരീക്ഷക്ക് അപേക്ഷിക്കാം. 45 ശതമാനം മാര്‍ക്കോടെയുള്ള പ്ലസ്ടുവാണ് യോഗ്യത (www.cee.kerala.gov.in ).

കേരളത്തിലെ സര്‍ക്കാര്‍, സ്വാശ്രയ കോളജുകളിലെ ബാച്‌ലര്‍ ഓഫ് ഡിസൈന്‍ ( ബി.ഡിസ്) പ്രവേശനത്തിനുള്ള
പ്രവേശനപരീക്ഷയായ കേരള സ്റ്റേറ്റ് ഡിസൈന്‍ ആപ്റ്റിറ്റിയൂഡ് ടെസ്റ്റിന് അപേക്ഷിക്കാം (ksid.ac.in).

ജയ്പൂരിലെ ഇന്ത്യന്‍ ഇന്‍സ്റ്റിറ്റ്യൂട്ട് ഓഫ് ക്രാഫ്റ്റ്‌സ് ആന്‍ഡ് ഡിസൈനിലെ വിവിധ ഡിസൈന്‍ പ്രോഗ്രാമുകളുണ്ട്. ഓണ്‍ലൈന്‍ പരീക്ഷ വഴിയാണ് പ്രവേശനം (www.iicd.ac.in).

ചാര്‍ട്ടേര്‍ഡ് അക്കൗണ്ടന്‍സി (CA), കമ്പനി സെക്രട്ടറിഷിപ്പ് (CS), കോസ്റ്റ് & മാനേജ്‌മെന്റ് അക്കൗണ്ടന്റ് (CMA) തുടങ്ങി വിവിധ ചാര്‍ട്ടേര്‍ഡ് കോഴ്‌സുകളും എല്ലാ പ്ലസ് ടു സ്ട്രീമുകാര്‍ക്കും പരിഗണിക്കാവുന്നതാണ്.

ഇംഫാലിലെ നാഷനല്‍ സ്‌പോര്‍ട്‌സ് യൂനിവേഴ്‌സിറ്റിയിലെ സ്‌പോര്‍ട്‌സുമായി ബന്ധപ്പെട്ട വിവിധ ബിരുദ പ്രോഗ്രാമുകള്‍ക്കും താല്‍പര്യമുള്ളവര്‍ക്ക് അപേക്ഷിക്കാം (www.nsu.ac.in).

കൊച്ചിയിലെ സിഫ്‌നെറ്റ് നടത്തുന്ന ബാച്‌ലര്‍ ഓഫ് ഫിഷറീസ് സയന്‍സ് (നോട്ടിക്കല്‍ സയന്‍സ്) പ്രോഗ്രാമിനും സയന്‍സ് സ്ട്രീമുകാര്‍ക്ക് അപേക്ഷിക്കാം (cifnet.gov.in). പ്ലസ് ടു സയന്‍സുകാര്‍ക്ക് ലാറ്ററല്‍ എന്‍ട്രി വഴി പോളിടെക്‌നിക്കുകളില്‍ രണ്ടാം വര്‍ഷം ചേരാനും അവസരമുണ്ട് (polyadmission.org).

വിദ്യാഭ്യാസ വാർത്തകള്‍ വാട്സ്ആപ്പിൽ ലഭിക്കാന്‍ ക്ലിക് ചെയ്യുക