തിരുവനന്തപുരം: സംസ്ഥാനത്തെ സ്‌കൂളുകളിലെ ഓണാവധി വെട്ടിച്ചുരുക്കുമെന്ന വാർത്തയോട് പ്രതികരിച്ച് വിദ്യാഭ്യാസമന്ത്രി വി ശിവൻകുട്ടി. അത്തരത്തിലൊരു തീരുമാനം പൊതുവിദ്യാഭ്യാസ വകുപ്പ് തീരുമാനിച്ചിട്ടില്ലെന്ന് മന്ത്രി അറിയിച്ചു. സംസ്ഥാനത്തെ സ്‌കൂൾ വിദ്യാർഥികളുടെ ഓണാവധി വെട്ടിച്ചുരുക്കാൻ സർക്കാർ തീരുമാനിച്ചു എന്ന രീതിയിൽ ബിജെപി - ആർഎസ്എസ് അനുകൂല ചാനലായ ജനം ടിവി നൽകിയ വാർത്ത അടിസ്ഥാനരഹിതവും വാസ്തവ വിരുദ്ധമെന്ന് മന്ത്രി പ്രതികരിച്ചു. വാർത്തയിൽ സമസ്ത പിന്തുണ അറിയിച്ചു എന്ന തരത്തിലായിരുന്നു പ്രചാരണം. 

'ജനം ടിവി വാർത്ത വാസ്തവ വിരുദ്ധം. ഓണാവധി വെട്ടിക്കുറയ്ക്കാൻ ഒരു നീക്കവുമില്ല. പണിയെടുത്ത് ജീവിച്ചൂടെ' എന്ന് മന്ത്രി വി ശിവൻകുട്ടി ഫേസ്ബുക്കിലും കുറിച്ചു. ജനം ടിവി സോഷ്യൽ മീഡിയയിൽ പങ്കുവെച്ച് പോസ്റ്റർ വെട്ടിയാണ് മന്ത്രിയുടെ പ്രതികരണം.

 

 

 

സാമൂഹിക മാധ്യമങ്ങളിൽ പ്രചരിക്കുന്ന വാർത്തകൾ പൂർണ്ണമായും വ്യാജമാണ് എന്ന് മന്ത്രി മാധ്യമങ്ങളോട് പ്രതികരിച്ചു. ഇത്തരം പ്രചരണങ്ങളെ മന്ത്രി തള്ളി. ബോധപൂർവ്വം വ്യാജവാർത്തകൾ പ്രചരിപ്പിക്കുകയാണ്. ഇത്തരം വ്യാജസന്ദേശങ്ങൾ തയ്യാറാക്കുന്നതും പ്രചരിപ്പിക്കുന്നതും നിയമവിരുദ്ധമായ പ്രവർത്തിയാണെന്നും മന്ത്രി പറഞ്ഞു. ഓണാവധിയുടെ കാര്യത്തിലുള്ള സർക്കാർ നയം മാറ്റം വരുത്താൻ ആലോചിക്കുന്നില്ല. തെറ്റായ വിവരങ്ങൾ പ്രചരിപ്പിക്കുന്നത് ഒഴിവാക്കണമെന്നും മന്ത്രി അഭ്യർഥിച്ചു.