കോഴിക്കോട്: പേരാമ്പ്രയിൽ സ്വകാര്യ ബസിടിച്ച് വിദ്യാർഥി മരിച്ച സംഭവത്തിൽ ബസിനെതിരെ നടപടിയെടുത്തത് കോഴിക്കോട് ജില്ലാ കലക്ടർ. ബസിന്റെ പെർമിറ്റ് മൂന്നു മാസത്തേക്ക് റദ്ദാക്കി കലക്ടർ ഉത്തരവിറക്കി. കോഴിക്കോട് കുറ്റ്യാടി റൂട്ടിൽ സർവീസ് നടത്തുന്ന ഒമേഗ ബസിനെതിരെയാണ് നടപടി. മരുതോങ്കര സ്വദേശി അബ്ദുൾ ജവാദ് എന്ന വിദ്യാർഥി സ്വകാര്യ ബസിടിച്ച് മരിച്ച സംഭവത്തിലാണ് നടപടി.
 
റീജിണനൽ ട്രാൻസ്പോർട്ട് അതോറിറ്റിയുടെ യോഗത്തിലാണ് ട്രാൻസ്പോർട്ട് അതോറിറ്റിയുടെ ചെയർമാൻ കൂടിയായ ജില്ല കലക്ടർ ബസിന്റെ പെർമിറ്റ് റദ്ദാക്കാൻ ഉത്തരവിട്ടത്. അപകട സമയത്ത് ബസ് ഓടിച്ചിരുന്ന ഡ്രൈവറുടെ ലൈസൻസ് നേരത്തെ സസ്‌പെൻഡ് ചെയ്തിരുന്നു. 

കഴിഞ്ഞ ജൂലൈ 19 ന് വൈകീട്ടാണ് പേരാമ്പ്രയിൽ വെച്ച് മരുതോങ്കര സ്വദേശി അബ്ദുൾ ജവാദ് സ്വകാര്യ ബസിടിച്ച് മരിച്ചത്. കാലിക്കറ്റ് യൂണിവേഴ്‌സിറ്റിയുടെ ചാലിക്കര റീജ്യണൽ സെന്ററിലെ ബിരുദാനന്തരബിരുദ വിദ്യാർഥിയായിരുന്നു. വൈകീട്ട് ക്ലാസ് കഴിഞ്ഞ് മടങ്ങുമ്പോഴാണ് അപകടം ഉണ്ടായത്. കോഴിക്കോട് കുറ്റ്യാടി റൂട്ടിൽ സർവീസ് നടത്തുന്ന ഒമേഗ ബസ് മറ്റൊരു സ്വകാര്യബസുമായുള്ള മത്സയോട്ടത്തിനിടയിൽ എതിരെ വന്ന അബ്ദുൾ ജവാദിന്റ ബൈക്കിനെ ഇടിച്ച് തെറിപ്പിക്കുകയായിരുന്നു. ജവാദ് സംഭവ സ്ഥലത്ത് വെച്ച് തന്നെ മരിച്ചു.