പാലക്കാട്: ചുള്ളിമട ജനവാസ മേഖലയില്‍ വീണ്ടും കാട്ടാന ഇറങ്ങി. ഇന്നലെ രാത്രി 10 മണിയോടെയാണ് ഒറ്റയാന്‍ എത്തിയത്. പ്രദേശവാസികളും വനംവകുപ്പും ചേര്‍ന്നു പടക്കം പൊട്ടിച്ച് കാട്ടാനയെ തിരികെ കാട്ടിലേക്കു തന്നെ അയച്ചു. രണ്ടു ദിവസമായി പ്രദേശത്ത് കാട്ടാനകള്‍ നിലയുറപ്പിച്ചിരിക്കുകയാണെന്നാണ് പ്രദേശവാസികള്‍ പറയുന്നത്.

ആന ഉള്‍ക്കാട്ടിലേക്ക് പോയിട്ടില്ലെന്നും പ്രദേശത്ത് നിരീക്ഷണം തുടരുന്നുണ്ടെന്നും വനം വകുപ്പും അറിയിച്ചു. ഇന്നലെ കാട്ടാനയുടെ ആക്രമണത്തില്‍ മരിച്ച അലന്റെ പോസ്റ്റ്‌മോര്‍ട്ടം ഇന്നു നടക്കും. അലന്റെ അമ്മ ഗുരുതരമായി പരിക്കേറ്റതിനാല്‍ തന്നെ ചികിത്സയില്‍ തുടരുകയാണ്. ഈ സംഭവത്തില്‍ പ്രദേശത്ത് പ്രതിഷേധം തുടരുകയാണ്. മുണ്ടൂര്‍ പഞ്ചായത്ത് പരിധിയില്‍ സിപിഎമ്മിന്റെ നേതൃത്വത്തില്‍ ഉച്ചവരെ ഹര്‍ത്താല്‍ ആചരിക്കും.

മുണ്ടൂര്‍ കയറാം കോട് മേഖലയില്‍ കാട്ടാനകള്‍ നിലയുറപ്പിച്ചിട്ടും ജനങ്ങളെ വിവരമറിയിക്കാന്‍ വനം വകുപ്പ് വൈകിപ്പിച്ചെന്നാരോപിച്ചാണ് സിപിഎമ്മിന്റെ പ്രതിഷേധം. കാട്ടാന ആക്രമണത്തില്‍ മുണ്ടൂരില്‍ കഴിഞ്ഞ ഏഴുവര്‍ഷത്തിനിടെ മരിച്ചത് നാലരുപേരാണ്. ഒരു സ്ത്രീയുള്‍പ്പെടെയാണ് നാലു പേര്‍ മരിച്ചതെന്നാണ് വനംവകുപ്പിന്റെ കണക്ക്.

വനം വകുപ്പ് വാച്ചര്‍മാരില്‍ ഇരുപതോളം പേര്‍ക്കും പരുക്കേറ്റു. ഏക്കര്‍കണക്കിനു കൃഷിയിടങ്ങളാണ് കാട്ടാനകള്‍ നശിപ്പിച്ചതെന്നും വന്യമൃഗശല്യം തടയാന്‍ വനാതിര്‍ത്തികളില്‍ സ്ഥാപിച്ച പ്രതിരോധമാര്‍ഗങ്ങള്‍ കാര്യക്ഷമമല്ലെന്നുമാണ് നാട്ടുകാര്‍ പറയുന്നത്.