മനാമ: നാടുകടത്തല്‍, യാത്രാ നിരോധന തീരുമാനങ്ങളില്‍ ജുഡീഷ്യറിക്ക് അധികാരം നല്‍കാനുള്ള പാര്‍ലമെന്ററി നിര്‍ദ്ദേശം ബഹ്‌റൈന്‍ ഭരണകൂടം നിരസിച്ചു. ഈ നീക്കം ദേശീയ സുരക്ഷയ്ക്ക് നേരിട്ട് ഭീഷണിയാകുമെന്ന മുന്നറിയിപ്പിനെ തുടര്‍ന്നാണിത്.

സിവില്‍, കൊമേഴ്‌സ്യല്‍ എക്‌സിക്യൂഷന്‍ നിയമത്തിലെ ആര്‍ട്ടിക്കിള്‍ 40ല്‍ നിര്‍ദ്ദേശിക്കപ്പെട്ട ഭേദഗതി, നാടുകടത്തലും യാത്രാ വിലക്കും നേരിടുന്ന പ്രവാസി താമസക്കാര്‍ ഉള്‍പ്പെടുന്ന കേസുകളില്‍ വിധി പറയാന്‍ മൂന്ന് ജഡ്ജിമാരുടെ ഒരു പാനലിനെ അധികാരപ്പെടുത്തുന്നതായിരുന്നു. കൂടാതെ ഏഴ് ദിവസത്തിനുള്ളില്‍ ഹൈക്കോടതിയില്‍ അപ്പീലുകള്‍ സമര്‍പ്പിക്കാനും നിയമം അനുവദിച്ചിരുന്നു.

നാടുകടത്തല്‍ ഒരു പരമാധികാര അവകാശമാണെന്നും അത് ജുഡീഷ്യല്‍ വിവേചനാധികാരത്തിന് വിധേയമാകാന്‍ കഴിയില്ലെന്നും വാദിച്ചുകൊണ്ട് സര്‍ക്കാര്‍ ഈ നടപടിയെ ശക്തമായി എതിര്‍ത്തു. 'നാടുകടത്തല്‍ പരമാധികാര പ്രവൃത്തിയുടെ പരിധിയില്‍ വരുന്നതാണ്.' സര്‍ക്കാര്‍ മെമ്മോറാണ്ടത്തില്‍ പറഞ്ഞു.

പൊതു സമാധാനം, സുരക്ഷ, ധാര്‍മ്മിക നിലവാരം എന്നിവ നിലനിര്‍ത്തുന്നതിനുള്ള നിര്‍ണായക ഉപകരണമാണ് നാടുകടത്തല്‍ എന്ന് അധികാരികള്‍ പറഞ്ഞു. ഇത്തരം തീരുമാനങ്ങള്‍ ജുഡീഷ്യല്‍ അവലോകനത്തിന് വിധേയമാക്കുന്നത്, സാധ്യമായ ആഭ്യന്തര ഭീഷണികളെ നേരിടുന്നതില്‍ വേഗത്തിലും നിര്‍ണ്ണായകമായും പ്രവര്‍ത്തിക്കാനുള്ള രാജ്യത്തിന്റെ കഴിവിനെ തടസ്സപ്പെടുത്തുമെന്നും സര്‍ക്കാര്‍ മുന്നറിയിപ്പ് നല്‍കി.

നിലവിലുള്ള നിയമ ചട്ടക്കൂട് വ്യക്തിഗത അവകാശങ്ങള്‍ക്കും പൊതുതാല്‍പ്പര്യത്തിനും ഇടയില്‍ ശരിയായ സന്തുലിതാവസ്ഥ കൈവരിക്കുന്നുണ്ടെന്ന് വാദിച്ചുകൊണ്ട് കരട് നിയമം പിന്‍വലിക്കാന്‍ സര്‍ക്കാര്‍ പാര്‍ലമെന്റിനോട് ആവശ്യപ്പെട്ടു. ഭേദഗതി നിയമപരമായ അനിശ്ചിതത്വം സൃഷ്ടിക്കുമെന്നും അന്തിമ കോടതി വിധികളുടെ നടപ്പാക്കലില്‍ വിട്ടുവീഴ്ച ചെയ്യുമെന്നും മുന്നറിയിപ്പ് നല്‍കി.

ക്രിമിനല്‍ കേസുകളില്‍ നാടുകടത്തല്‍ ഒരു അനുബന്ധ ശിക്ഷയായി ചുമത്താമെന്നും മെമ്മോറാണ്ടം വ്യക്തമാക്കി. അത്തരമൊരു ശിക്ഷ അന്തിമമായിക്കഴിഞ്ഞാല്‍ അത് കാലതാമസമില്ലാതെ നടപ്പിലാക്കണം. 

'ഒരു അന്തിമ ക്രിമിനല്‍ വിധി പുനഃപരിശോധിക്കാന്‍ കഴിയില്ല. മറ്റൊരു സ്ഥാപനത്തിനും അതിന്റെ ഫലം വൈകിപ്പിക്കാനോ പഴയപടിയാക്കാനോ കഴിയില്ല,' സര്‍ക്കാര്‍ പറഞ്ഞു.

Bahrain government rejects parliament's proposal to grant judiciary power over travel ban decisions, citing concerns over judicial independence and the separation of powers, highlighting constitutional and legal debates.